Langile baten kaleratzea dela-eta, Tubacex-Aceralavako enpresa batzordeak mobilizazioak iragarri zituen iragan astean. STAT, LAB, CCOO, ELA eta UGT sindikatuek txanda bakoitzean ordubeteko lan uzteak egiteko deia luzatu zieten enpresako langileei.
Atzokoa izan zen protesten lehendabiziko eguna, kaleratutako langilea berriz ere hartu ezean asko luzatu daitekeen dimanikari hasiera eman ziona. Goizeko txandan, hamarretatik hamaikak arte eten zuten lanaldia langileek, bai Laudioko lantegian bai Amurriokoan lan uztea ia erabatekoa izan zen; bulegoetako langileak eta kargudunak kenduta beste guztiek gelditzea erabaki zuten. Arratsaldean eta gauean ere gauza bera gertatu zen, langileen artean erantzuna erabatekoa izan zen-eta.
Langileak egiten ari diren presio neurri hauekin, enpresak hausnartu eta kaleratutako langilea berriz ere onartu dezan nahi dute; erdi mailako kargudun batekin izandako liskarrengatik kaleratu baitzuten. Enpresak ezarritako neurria "gehiegizkoa" eta "neurrigabea" dela adierazi dute sindikatu guztiek.