Urduñan nabaria da Otxomaio jaiak heltzear daudela. Hiriko alde zaharrean hainbat elkarte txosnak atontzen hasi dira jada: margoketa eta garbiketa lanak, hornitzaileen joan etorria... lan eta lan maiatzaren 7an txupina pizten denerako guztia prest egon dadin.
Era berean, Urduñako kirol zein kultur elkarteak jo ta su ari dira hiriko jaietarako prestaturiko ekintzei azken ukituak ematen; hori baitugu Otxomaio jaietako ezaugarri nagusietarikoa. Hiriko elkarteek jaien antolakuntzan duten pisua oso handia denez, honek posible egiten du ekintzez beteriko egitarau mardula osatzea; hau dela eta, jai-batzordea zein kultur eta kirol elkarteak buru belarri ari dira programaturiko ekintzak prestatzen. Esaterako, maiatzaren 15ean Delikako zelaietan egingo den aeromodelismo kontzentraziorako lurreratze pistan konponketak egin berri dituzte; gauza bera esan daiteke udal pilotalekuan frontisean egin diren lanekin edota bolatokian eginikoekin.
Maiatzaren 7an txupinazoa botatzen denetik, maiatzaren 16an bihotza erretzen denera arte, besteak beste, bolo-jokoak, lehiaketa gastronomikoak, aeromodelismoa, dantzaldiak, eskupilota partidak, playback-a, zezenketak, erromeriak, hipika, herri kirolak, kontzertuak eta beste ekintza asko egingo dira Urduñan. Aiaraldea.com-ek jarraipen berezia egingo die ekintza hauei eta hemen jaien berri izateko aukera izango duzue, baita gure agendaren bitartez ere.