Hip-hoparekin gertatzen dena ez da inolaz ere berria. Musika estilo bakoitzak estetika eta parafernalia bat ekarri du pack berean, baita letretan gai propioak ere. Askotan hiriko tribu bilakatzeraino garatzen da estetikarekiko fideltasuna, eta rol joko bat bailitzan karikatura bilakatzeko arriskua dago. Baina raperoak beste talde batzuk baino kritikatuagoak direla esango nuke, eta aurreiritzi horiek hip-hopak berak baino klitxe gehiago dauzkatela ere bai.
Kodigo Nortek Gasteiz ordezkatzen du, VI, beraiek dioten bezala. Hizkera urbanoa, saskibaloiko eta zinemako similak, auzoko eta kaleko bizipenak, hip-hoparen munduan izena egiteko bide eta bide-zidorrak, benetakoaren eta fake-aren arteko desberdintasuna, eta, zergatik ukatu, egoaren gorazarrea, narzisismoa… Ez diotela generoari bizkarra ematen, alegia.
Izenburuan aurreratzen dutenez, disko berri honetan, bigarren zatian batik-bat, erritmo jamaikarretara hurbiltzen dira pista batzuetan DJ Lororen aginduetara eta, lehenengo entzunaldietan ematen duenez, biraketa interesgarria izan daiteke.
Hip-hoparen erritmo errepikakorrak hipnotizatzen bazaitu, diskurtso bat antolatzeko errima eta beat-a powerpointa baino gustukoago badituzu, generoaren fetitxismo eta bitxikeriak interesatzen bazaizkizu edo Gasteizko mobida ezagutu nahi baduzu Kodigo Norte izan daiteke zure taldea.