Gaueko bederatziak, industrialdea. Oilar-probak eta Frank T. Puntual iritsi ginen tamainako hitzordura, eta hip-hop base indartsuek eman ziguten ongi etorria metalera ohituago dagoen elkartera. Hotz xamar hasi zen gaua, izan ere oilar-probetarako izena eman zuten Mc-ak azken momentuan kikildu egin ziren, eta entzule kopurua ere… Tira, giro familiarra zegoela, alegia. Eskerrak Laudio ordezkatuz, Josito eta luciFer in da haus zirela.
Kantuak kantu, Frank T handiaren unea iritsi zen eta Soy una tostadora izeneko azken diskoa defendatzeari ekin zion. Xigorgailu bat eskenatokian eta abeslaria moldeko ogia xigortzen… Performance honen eta diskoaren izenaren zentzua zein den? Bada automata edo ziborg-ak gutxiesteko erabiltzen da xigorgailu hitza, eta gizakiak berritasunei eta aldaketei dien fobiaren irudia izan daiteke ziborgfobia. Orain aplika ezazu hori gizarte kontuetara, eta Soy una tostadora lema eta jarrera ulertu ahal izango dituzu.
Kontzertua bikaina: ahots, memoria eta jario amaiezinak, astuna izan gabe publikoarekin interakzioa… Sarreraren 12 euroak inbertsio ona izan zirela esan beharra dago. Eta, diruaz ari garela, detailetxo bat: antolatzaileak esan zigunez, kontzertuaren aurreko egunean 40 sarrera inguru zituzten salduak, katxea ordaintzetik oso oso urrun. Hain urrun non Frank T-ri deitu behar izan zioten salmentaren berri emateko eta hala nahi izanez gero ez etortzeko gonbidapena egiteko. Erantzuna? Berdin zitzaiela 40 edo 10 sarrera salduta izan, beraiek etorri eta jo egingo zutela. Eskertzekoa zinez.
Honaino iritsi eta Frank T nor den ez dakienarentzat, biografiatxo bat, etxetik ibiltzekoa: Tsihmini Nsombolay Kinshasan jaio zen 1973an. Haren familia Estatu Batuetara bizitzera zihoala Espainian harrapatuta geratu ziren dokumentazio kontuak zirela eta. Madrilen Zona Bruta mugimenduan ibili zen jada Frank T ezizenarekin, eta CPV edo Club de los Poetas Violentos taldeko partaide izan zen bakarkako bideari ekin aurretik. Horra gure Xigorgailuaren nondik norakoa.