Gipuzkoako Batzar Nagusiek 838 milioiko aurrekontua onartu dute

EAJk eta PSEk 2017ko aurrekontuak onartu dituzte Gipuzkoako Batzar Nagusietan. Datorren urtean, diputazioak 838 milioi euro izango ditu gastu eta inbertsio publikorako, aurtengo aurrekontuetan baino 25,6 milioi euro gehiago (%3). Markel Olano diputatu nagusiak nabarmendu zuen aurrekontuok inoizko «sozialenak» direla. 838 milioi eurotik 364 milioi euro gizarte gasturako izango dira, aurten baino 19 milioi euro gehiago. Sustapen ekonomikoari begira, berriz, aurten bezala, 50 milioi euro inbertituko ditu aldundiak, «lurraldeko enpresa sarea sendotzeko eta jarduera ekonomikoa bultzatzeko». Olanok esan zuen azken hilabetean legealdiko azpiegitura nagusiak esleitu direla: adibide gisa jarri zituen Zubietako erraustegia, Deskarga autobidea eta N-1eko kamioientzako errepide saria.

EH Bilduk eta Ahal Dugu-k aurka bozkatu zuten, eta PP abstenitu egin zen. EH Bilduko Xabier Olanoren arabera, EAJk eta PSE-EEk nahiago izan dute PPrekin negoziatu, eta «baztertu egin dituzte Gipuzkoako biztanleriaren erdia ordezkatzen duten alderdi politikoen ekarpenak». Haren esanetan, koalizio abertzalea behin eta berriz ahalegindu da diputazioak aurkeztutako aurrekontuetan azaldutako zuloak estaltzen, «baina ezinezkoa izan da». Haren irudiko, enpresa txiki eta ertainen zailtasunak ez dituzte aintzat hartzen aurrekontuek, eta horiek sortzen dute enplegua.

EAJ eta PSEren erantzuna

Markel Olanok, berriz, salatu zuen EH Bilduk eta Ahal Dugu-k azaldutako jarrerak zaildu egin duela akordioa lortzea. «Argi utzi digute ez dutela borondaterik, eta haiek ere aitortu dute ez zutela argazkietan agertu nahi», gaineratu zuen. Mikel Antxon Arrizabalaga PSE-EEko eledunaren arabera, aurrekontuak gipuzkoarren beharrei erantzuten die. Arrizabalagak argudiatu zuenez, Ahal Dugu-k eta EH Bilduk aurkeztutako proposamenek ez diote mesederik egiten Gipuzkoako gizarteari.