Ezker abertzaleak presoen aldeko beste ekinaldi bat prestatu du

Sortuk urtarrileko kongresuan erabaki zuen berak hartzea ezker abertzalean euskal presoen «babes politikoaren» ardura, eta, hori egituratzen segitzen duen artean, ezker abertzaleak beste ekinaldi mobilizatzaile bat prestatu du. Hurrengo sorta apirilaren 17tik uztailaren bukaera arte garatuko du, presoen, iheslarien eta deportatuen alde. «Gatazkaren faserik gordineneko ondorioen konponketaren aldeko borrokan» segituko dute, Donostian egindako agerraldian Jokin Urainek eta Oihana Garmendiak esan dutenez. Sektore desberdinetako jende ezaguna izan da aurkezpenean: Arkaitz Rodriguez Sortuko bozeramailea, Ainhoa Etxaide LABeko idazkari nagusia, Lur Albizu Ernaiko kidea, Aitor Servier Aitzinako kidea, Juan Mari Olano preso ohia, Arantza Arruti militante historikoa… «Presoak, iheslariak eta deportatuak dauden bitartean, ez da izango Euskal Herri librerik eta baketsurik».

Euskal udaberria Kalera. Bakea eta askatasuna irabaztera leloa izango du ekinaldiak. «Presoak kaleratzearen aldeko borroka, memoriaren aldekoa, biktima guztien erreparazio eta errekonozimenduaren aldekoa, desmilitarizazioaren aldekoa... geroari begirako prozesuak dira, eta garatzeko daude. Bake eta askatasunezko geroa nahi dugu gure herriarentzat».

Apirilaren 17an lore eskaintza bat egingo dute Gernika-Lumon (Bizkaia), herria suntsitu zuteneko 80. urteurrena dela eta. Gernikako arbolaren ondoan batuko dira. Maiatzaren 8tik 14ra, 1977ko amnistiaren aldeko astea oroituko dute, eta orduan hildako zazpi lagunei «herri omenaldia» egingo diete. Ortuellan (Bizkaia), Iruñean, Bilbon eta Errenterian (Gipuzkoa) egingo dituzte ekitaldiak; nagusia, maiatzaren 14an, Errenterian: manifestazio nazionala. Maiatzaren 20an, martxak egingo dituzte Frantziako Estatuko hiru espetxetara eta Espainiako beste hirutara, euskal presoen urruntzea salatzeko. Eta, uztailaren 20-27rako, ibilaldi bat antolatu du ezker abertzaleak: Gernika-Lumo eta Sakana (Nafarroa) artekoa, duela 40 urteko Askatasunaren Martxa oroitzeko. Belaunaldi zahar eta berriak elkartu nahi dituzte orduan. Uda osoan, «errepresaliatu politikoak» gogoan izango dituzte herrietako festetan.

Majarenas, lehen aldiz kalera

Sara Majarenas euskal presoa herenegun atera zen kalera lehen aldiz Madrilgo harrera zentrotik, Izar alabarekin, haren aldeko plataformak jakinarazi duenez. Bi ordu eta erdiko baimena eman zien Jose Luis Castro Espainiako Auzitegi Nazionaleko Espetxe Zaintzako epaileak. Egunero atera ahal izango dira, 17:00-19:30 artean. Hala ere, epaileak astegunetan goizez ordubetez eta larunbatetan eta igandeetan goizez bi orduz irtetea ukatu die, eta plataformak helegitea aurkeztuko du.

Castrok martxoaren 3an malgutu zion espetxe gradua Majarenasi. Aitak, urtarrilaren 15ean, labanaz zauritu egin zuen umea, espetxetik ateratzeko baimen bat baliatuta. Kartzelan jaio zen haurra, eta amarekin bizi zen han. Martxoaren 2an bete zituen 3 urte, eta, legediaren arabera, biak orduan banandu behar zituzten. Picassenteko espetxean (Herrialde Katalanak) zeuden.