Luzatu egingo dituzte Gasteizko aurrekontuak

Gasteizko Udalak ez du aurrekontu berririk izango 2018an, eta aurtengoak luzatu beharko ditu. Atzo, oposizio guztiak bozkatu zuen aurrekontu proiektuaren aurka, eta, ondorioz, atzera bota zuen aurrekontu proiektua. EAJk eta PSEk osatutako gobernuak ez du lortu oposizioko talde bakar batekin ere akordioa lortzea. Ezta PPrekin ere. Hori hala, Gasteizko Udala izango da EAEko erakundeen artean aurrekonturik izango ez duen bakarra. Aurtengo kontuak luzatuta, Urtaranen gobernuak banan-banan negoziatu beharko ditu aurrera atera nahi dituen proiektu guztiak.

Gasteizen ez bezala, Donostiako Udalak onartu egin zituen atzo 2018ko aurrekontuak EAren eta PSEren babesarekin. Bi alderdiek gehiengo osoa dute, eta bien botoak nahikoak izan ziren aurrekontuek aurrera egiteko. 445 milioi euroko aurrekontua izango du Udalak datorren urtean, aurten baino %6,88 handiagoa. Atzoko eztabaidan oposizioko taldeetako zuzenketa partzial batzuk ere onartu zituzten.

Bestalde, Gipuzkoako Foru Aldundiko aurrekontuek ere aurrera egin zuten, PPren abstentzioarekin. Aurkako botoa eman zuten EH Bilduk eta Ahal Dugu-k. Markel Olanoren hirugarren aurrekontuak izango dira 2018koak.

Arabako Foru Aldundian, berriz, akordioa lortu zuten duela bi aste EAJk, PSEk eta PPk, eta abenduaren 27an bozkatu eta onartuko dute aurrekontua. PPren zuzenketak txertatuko ditu foru gobernuak proiektuan; denera, 7 milioi euroren diru sailak hitzartu dituzte eskuineko taldearekin.