Paris bide berriaz Madril informatzen ari dela dio Berhokoirigoinek

Mixel Berhokoirigoin bakegile eta Ipar Euskal Herriko ordezkaritzako kideak adierazi du Frantziako Gobernuaren mintzaideak «baieztatu» diela euskal presoez hartu duen bide berriaz «informatzen» ari dela Madril. «Gauza ona hori, eta ondorioak positiboak baizik ez ditzake ukan», esan du Berhokoirigoinek Hala Bedi irratian. «Gurekin egiten ari den urratsak Madril puntuz puntu ari da informatzen, Parisen mintzaideak argiki erran digunez».

Justizia Ministerioko iturriek hilaren 13an jakinarazi zuten euskal presoak gerturatzen hasiko direla Mont de Marsan eta Lannemezan kartzelatara, eta hilaren 17an Nicole Belloubet Justizia ministroak baieztatu zuen jarrera aldaketa. Azaldu zuen «lehen aldiz esparru argi bat» eratu dela presoen auziaz hitz egiteko eta «ekiteko». Iazko urrian sortu zuten alde biko mahaia Ipar Euskal Herriko ordezkaritzak eta Parisek.

Berhokoirigoinek nabarmendu du «erabaki politiko bat» dagoela jarrera berri horren atzean, baina ohartarazi du beste kontu bat dela «prozedura administratiboa», hori «konplikatua» baita: presoen eskaerak banan-banan aztertu behar dira eta kartzela bakoitzak bere prozedura du.

Espainiako Estatuko sektore batzuek ez dute begi onez ikusi Parisen mugimendua, eta gaur Covite Terrorismoaren Biktimen Elkarteak bilera bat egingo du Helene Davo Justizia Ministerioko kabineteko zuzendariordearekin. Goizean batuko dira, Parisen, ministerioan. Covitek planari buruz dauzkan «zalantzak» aipatuko dizkio, elkartearen presidente Consuelo Ordoñezek aurreratu duenez. Haren arabera, ETAren «mandatariak» dira Bakegileak. «Ez dugu ulertzen haiekin negoziatzearen jokaldi politikoa».

Biharko bilera, atzeratua

Bihar ez da egingo Euskal Herriko ordezkaritzak eta Justizia Ministerioak hitzartua zeukaten bilera, Frantziako espetxeetako funtzionarioen mobilizazioak direla eta. Atzeratu egin dute, Bake Bideak aipatu duenez.