GEDen ekaineko giza katean parte hartuko duela jakinarazi du Egibarrek

Joseba Egibar GBBko presidente eta EBBko kideak adierazi du parte hartuko duela Gure Esku Dago-k ekainaren 10erako iragarri duen giza katean, eta, halaber, esan du laguntzen ari dela Donostian udazkenean «kontsulta» egin dadin, «sinadura emanda». Radio Euskadiko elkarrizketa batean gogoratu du Juan Jose Ibarretxe Eusko Jaurlaritzako lehendakaria zela Eusko Legebiltzarrak 2008an Galdeketa Legea onartu zuela, eta, Espainiako Auzitegi Konstituzionalaren debekuaren ondoren, «manifestazio bat» egin zutela «erabakitzeko eskubidearen inguruan». «Une hauetan ere egingo dugu. Koherenteak gara. Herritarren parte hartze hau ez da beharrezkoa; ezinbestekoa da», adierazi du. Aldiz, EAJk jakinarazi du, Egibarrek «pertsonalki» egin dituela adierazpen horiek. EBBk oraindik ez baitu esan giza katean izango den.

Donostia-Bilbo-Gasteiz arteko ibilbidea izango du giza kateak, 201,9 kilometrokoa, eta Gure Esku Dago-k dio gutxienez ehun mila lagun beharko direla. Joan den larunbatean iragarri zuen ekaineko mobilizazioa. Erabakitzeko eskubidearen aldeko dinamikak zioen ibilbidea hautatzeko kontuan hartu duela EAEko testuingurua. «Aurten, Araban, Bizkaian eta Gipuzkoan ikusi ditugu baldintzak eta testuingurua dimentsio honetako mobilizazio bat antolatzeko». Gure Esku Dago-ko ordezkariak aurreko astean Iñigo Urkullu Jaurlaritzako lehendakariarekin bildu ziren. Euren arteko lehen bilera publikoa izan zen.

Mahai ingurua gaur, Bilbon

Hegoaldeko lau hiriburuetan antolatu dituen mahai inguruekin abiatuko du GEDek Herritarron Ituna egitasmoa. Ongizatea, kultura, gure lurra eta herritartasuna landuko dira horietan, arloz arlo, eta hainbat eragilerekin. Gaur da lehenengoa, Bilboko Bizkaia aretoan (19:00). Ongizateari buruz ariko dira Garbiñe Aranburu, Jon Agirre, Emilio Olabarria, Adrian Zelaia eta Igor Mera. Moderatzailea: Helena Franco.