Ohi bezala, Donostian, Kontxako Banderaren bigarren jardunaldia jokatu ondorengorako euskal presoen eskubideen aldeko manifestaziora deitu du ezker abertzaleak —aurten ere, Kalera Kalera-k—, eta «dei berezia» egin du «orain» mobilizatzeko. «Orain ezin gara etxean gelditu. Kalera irten behar dugu kalera atera ditzaten, eta, behingoz, horrenbeste sufrimendu amai dadin», esan dute Haimar Altuna Sortuko kideak eta Olaia Matxain Ernaikoak, ekinbidearen aurkezpenean, Donostian. Datorren igandean izango da manifestazioa, 13:30ean, Bulebarretik abiatuta, Bada garaia. Orain presoak goiburupean.
Altunak eta Matxainek Kalera Kalera-ren izenean adierazi dute «presoen egoeraren irtenbide posibleei buruz adierazpen asko» izan direla azkeneko asteetan, baina «ekintzarik ez». Espainiako Estatua «etsipena zabaldu nahian» dabilela uste dute, eta presoen auzirako «irtenbide duin eta arrazoizko bat» eskatu dute.
Iñigo Urkullu Jaurlaritzako lehendakariak ere euskal presoak izan ditu hizpide Radio Euskadiko elkarrizketa batean. Gogoratu du Espainiako Estatuan euskal presoen %95 lehenengo graduan dauzkatela, eta eragileei eskatu die urratsak egiteko bestelako egoera batera iristeko. «Emango al ditugu behar diren pausoak egoera hori aldatzeko?», galdetu du elkarrizketan. Aurrerapausoak emateko, besteak beste, tartean sartu ditu Espainiako Gobernua eta euskal presoak.
Preso ohi baten epaiketa
Gaur zortzi epaituko dute Peio Irigoien euskal preso ohia, Baionako Auzitegian, Fijait neurriari uko egiteagatik, eta euskal preso ohiek elkarretaratze batera deitu dute egun horretarako, Baionako epaitegiaren aitzinean, 13:30ean.
Fijait fitxategia islamismo erradikalaren kontra egiteko neurri modura sortu zuen Frantziak, baina euskal presoak eta preso ohi batzuk zerrendan sartu zituen berehala. Gaur egun 50en bat euskal preso eta 20ren bat preso ohi ondorioak pairatzen ari dira.
Osorik irakurri
LAGUN AGURGARRIA:
Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.
Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.
Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.
Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.
Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.
Faktoria izan, egin zaitez bazkide.
Aiaraldea Hedabideko lantaldea.
Izan bazkide