Otegik galdetu du zer arazo dagoen EH Bilduren aurrekontu proposamena ez onartzeko

Arnaldo Otegi EH Bilduko koordinatzaile nagusiak galdetu du zer arazo dagoen EAEko aurrekontuei buruz bere taldeak egin duen «proposamen eraikitzaile eta egingarria ez onartzeko». «Gurea ez da itxurakeriatan geratzen den jarrera bat. Gure jarrera oso sendoa da», esan du Donostian, Nerea Kortajarena legebiltzarkidearekin batera emandako prentsaurrekoan, eta gaineratu du «politikoki proposamen sendoa» dela eurena, eta «ekonomikoki, bideragarria». «Gure lehentasuna herritarren ongizatea da. Beste batzuek bestelako interesak dituzte; adibidez, eliteak babestea». Otegik jakinarazi du EH Bilduk eta EAJk EAEko aurrekontuei buruzko bilera bat egingo dutela ostiral honetan.

Haren esanetan, EH Bilduren egitasmoak aintzat hartu ditu «egiturazko arazo sozialak, jendearen behar batzuk asetzeko» eta «aurrekontuek horri erantzun behar diote». Besteak beste, pentsiorik apalenak osatzeko 350 milioi euro inbertitzea eta enplegu politiketarako beste 70 milioi jartzea proposatu du indar subiranistak, eta Kortajarenak bideragarritzat jo du. «Jaurlaritzak jadanik osatzen ditu pentsioak. Hori zabaltzea da gure proposamenaren asmoa. Ekonomikoki egingarria da. Borondate politiko kontua baino ez da».

Joan den astean PSE-EErekin bildu zen EH Bildu, eta Otegik adierazi du haiek esan zietela «ongi» ikusten dutela proposamena; «EAJko ordezkari batzuek ere esan dute begi onez ikusten dutela eta egingarria dela. Ez dugu ulertzen non den arazoa».

Jaurlaritzako taldeek ez dute gehiengo osoa legebiltzarrean.