EAJk dio EH Bildu malgutu gabe ez dela kontuen akordiorik izango

EAEko datorren urteko aurrekontuen negoziazioen harira «malgutasuna» izateko eskatu dio EAJk EH Bilduri. Josune Gorospe EAJko legebiltzarkideak adierazi du EH Bilduk aurrekontu proiektuari osoko zuzenketarik ez aurkezteak «argi» adierazten duela talde horrek ez daukala arrazoirik aurrekontuak «bere osotasunean txarrak» direla esateko. Horregatik, jarrera «malgutzeko» eskatu dio Gorospek. EAJko kideak ohartarazi du aurrekontuetarako akordiorik ez dela egongo halakorik egin ezean.

«Orekarako puntua topatu behar dugu», esan du Gorospek. EH Bilduri eskatu dio aritu dadila Eusko Jaurlaritzaren mugen barruan eta errazteko aurrekontuen onarpena. Era berean, azaldu du Jaurlaritza prest dagoela EH Bilduk proposatutako zenbait neurri onartzeko eta aurrekontuen proiektuan txertatzeko, «betiere gure eskumenek eta finantzaketaren mugek uzten badute».

Gaurkoa izango da azkeneko eguna Iñigo Urkulluren gobernuaren aurrekontuen osoko zuzenketak aurkezteko. Herenegun, EH Bilduk aurreratu zuen ez duela halakorik egingo, «gobernuari beste aukera bat» emateko eta kontuak negoziatzen segitzeko. Edonola ere, pentsioei dagokien diru kopurua igotzeko zuzenketa bat egingo dutela jakinarazi zuen Maddalen Iriarte legebiltzarkideak, Donostian. Iriartek esan zuen Jaurlaritzak aldaketa horiek egiten ez baldin baditu datorren abenduaren 11n aurrekontuak ez dituztela onartuko.

Gorospek EH Bilduri eskatu dio ez hartzeko «dena ala ezer ez» jarrera, «jende askoren bizitza hobetu» dezaketelakoan. Alde horretatik, «konpromisoa» galdegin dio EH Bilduri.