Hiru urteko prozesu luzearen ostean, iragan martxoan Nafarroako Parlamentuak zuzenbide zibilaren arloko esparru propioa eguneratu zuen. Foru Berriak 594 artikulu edo lege jaso ditu, eta zuzenbide zibileko kontuak arautu ditu; hala nola pertsonei, familiei, ondorengotzari, jabetzari eta kontratuei buruzkoak.
Nafarroako Gobernuak atzo azaldu zuenez, hilabeteotan Madrilgo jarduneko gobernuarekin negoziatzen aritu da. Espainiako Gobernuak esan du 594 legeetatik hemezortzik estatuaren eskumen esklusiboa urratzen dutela. Javier Remirez Nafarroako presidenteordearen arabera, bi aldeek akordioa erdietsi zuten hamar legeren gainean; ez, aldiz, beste zortzi kasutan. Lehen Ministroen Kontseiluan erabaki zuten helegitea aurkeztea.
Errekurtsoa jarritako lau legek Jabego Erregistroei eragiten diete —horietatik baita hipotekei ere—, beste bik legeen arteko gatazkak nola konpondu arautzen dute, eta azken biek kontratuetan oinarrizko betebeharrak ezartzen dituzte. Helegitearen edukia ezagutu arte zuhur mintzatu da Remirez. «Helegitea ez da albiste ona; nahiko genuke akordioa lortzea, baina drama oro kendu nahi genioke, 594tik sei lege baitira».
Irmoago azaldu da EH Bilduko Bakartxo Ruiz: «Nafarroaren ahalmen legegilea murrizten du, eta autogobernuaren funtsetako bati erasotzen dio, gure zuzenbide zibilari». Gogorarazi duenez, Foru Berriaren bi lege «bankuen politikei aurre egiteko beharrezko tresnak» dira.
Geroa Bairen ustez, Pedro Sanchezek «gaizki» ekin dio agintaldiari, helegiteak talka egiten baitu «elkarrizketa bidez gatazkak ez judizializatzearen aldeko mezuarekin». Autogobernua irmo defenditzera dei egin dio gobernuari eta parlamentuari.
Navarra Sumaren ustez, «oso larria» da Espainiako Gobernuak egindakoa, auzitan jarritako zortzi legeek Nafarroaren eskumen propioa aitortzen zutelako, eta, horregatik, Nafarroako Kontseiluari eskatu dio auzitan jarritako lege horiek azter ditzala.
LAGUN AGURGARRIA:
Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.
Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.
Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.
Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.
Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.
Faktoria izan, egin zaitez bazkide.
Aiaraldea Hedabideko lantaldea.
Izan bazkide