Zoriondu zaituzte jada, ala goizegi da oraindik?
Tira, zentsura mozioa gauzatu arte itxoin beharko dugu, baina nahiko gauza segurua dirudi. Hortaz, geure burua zoriondu dezakegu, bai.
Nola joan da negoziazioa?
Ez da oraingo kontua izan. Hauteskundeen biharamunetik beretik saiatu ginen PSNrekin negoziatzen, Navarra Sumari alkatetzarako bidea ixte aldera. Orduko hartan, baina, ez zen posible izan.
Eta zer aldatu da ordutik?
Navarra Sumaren agintaldia pairatu dugu: haien gobernatzeko era autoritarioa eta sektarioa da erabat. Argi gelditu zen berehala hori geldiarazi beharra zegoela, eta PSNren barruko hainbat sektore mobilizatu dira, agintzeko modua aldatzeko xedez.
Ez da izan, beraz, zinegotzi bakar baten erabaki pertsonala?
Ez. Lizarrako PSNko hainbat militantek sustatutako mugimendua izan da: urtarril bukaeran, alderdiak batzarra egin zuen, eta militanteen gehiengoak zuzendaritzari eskatu zion zentsura mozioa aurkez zezala. Orduan hasi ginen haiekin elkartzen, negoziatzen, programak alderatzen eta adostasunak bilatzen. Hilabete baino gehiago eman dugu ituna adosten.
Zeintzuk dira itun programatikoaren lehentasunak?
Politika sozialak eta gizartearen behar larrienak lehenetsiko ditugu: biztanle askok arazoak dituzte hilabete bukaerara ailegatzeko edota etxebizitza lortzeko. Horren inguruan adostu ditugu hainbat puntu. Euskara, elikadura subiranotasuna, ekonomia zirkularra, mugikortasuna... Hiria hobetzeko hamaika ardatz jaso ditugu itunean.
PSNk ez du akordioa babestu, eta «iruzurra» dela esan du. Zer iruditu zaizu erreakzio hori?
Aitortu behar dut egun osoa lanean eman dudala, eta ez diedala kasu handirik egin beste taldeen erreakzioei. Niretzat, garrantzitsuena da bederatzi zinegotzi bat gatozela eta ezkerreko akordio bat sinatu dugula gobernua aldatzeko.
Lizarrako kasua eredu izan daiteke beste udal batzuetan?
Herriz herri ikusi beharko da hori. Lizarrako kasuak baditu ezaugarri propio batzuk; horiei esker, egoera baliatu ahal izan dugu Navarra Suma kanporatzeko. Beste udalerri batzuetan, ezkerreko taldeek ikusi beharko dute nolako oreka dagoen taldeen artean eta PSNren barruan.
LAGUN AGURGARRIA:
Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.
Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.
Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.
Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.
Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.
Faktoria izan, egin zaitez bazkide.
Aiaraldea Hedabideko lantaldea.
Izan bazkide