1
BOTOAK17.517
LEGEBILTZARKIDEAAraba: Maria Amaia Martinez.
Ultraeskuineko alderdi batek ordezkaritza izango du Eusko Legebiltzarrean heldu den legegintzaldian. Probokazioan, aurrez aurrekoetan eta iskanbilen peskizan oinarritutako kanpaina egin dute Voxekoek. Haiek nahi bai, baina merezi ez zituzten fokuen distira izan dute, eta haiek nahi bai, baina merezi ez zituzten lerroburuak eta lerroak lortu dituzte. Izan dute horretan haien kontrako protestariek izan duten baino babes gehiago, eta izan dituzte PPk eta Ciudadanosek asebete ez dituzten beste hainbaten boz gehiago. Araban eskuin muturreko alderdiari begira jarri dute jendea inkestek eta bazetozela esanez egindako iragarpenek. Eta balizko etorrera horri begirakoak izan dira alderdi askoren mezuak eta erreguak kanpainako azken txanpan. Baina haien kontrako «horma» eraikitzeko deiak ez du eraginkortasunik izan, eta Santiago Abascal buru duen alderdiak tokia egitea lortu legebiltzarrean. Maria Amaia Martinez ezezagunak jarlekua izango du, horrenbestez, Gasteizko parlamentuan.
Eta egia da azken emaitzei erreparatuta, Voxek bazeukala nahikoa aukera legebiltzarrean toki hori lortzeko. Espainiako Gorteetarako iazko apirilean egindako bozetan, 5.608 boto eskuratu zituen Araban (%3,16) eta hurrena azaroan egindakoetan 6.421 boto (%3,76). Eusko Legebiltzarreko aulkien lehian sartzeko lurralde bakoitzean gutxienez botoen %3 jaso behar dira. Gutxieneko portzentaje hori lortzea ezinbestekoa da ordezkari bat lortzeko, nahiz eta beti ez den nahikoa izaten. Legebiltzarreko atea ireki ohi du botoen %3 erdiesteak, eta hasieratik ikusi zen atzo eserleku hori lortzeko aukera izango zuela Voxek. Halaxe egin zuen:4.722 boto Araban (%3,80), eta 17.517 orotara.
Santiago Abascal Voxeko presidentea pozarren mintzatu zen Madrildik. «Euskadiko espainiarrek» Vox «sendotu» dutela, eta legebiltzarkide bakar hori lortu izana «historikoa» dela esan zuen: «Ilusio berezia egiten dit, Araban izan delako, nire aberri txikian». Euren hautesleei agindu zien, legebiltzarkide bakar horrek ez diela «traiziorik» egingo, «PPkoek eta PSEkoek bezala».
LAGUN AGURGARRIA:
Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.
Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.
Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.
Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.
Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.
Faktoria izan, egin zaitez bazkide.
Aiaraldea Hedabideko lantaldea.
Izan bazkide