<br /><br /> Euskal Elkargoa zerbitzu bururik gabe dela salatu dute sindikatuek <br />

BAIONA. Euskal Hirigune Elkargoko CFDT, LAB eta CGT sindikatuek agiri bateratu bat plazaratu dute Ipar Euskal Herriko erakundeko administrazio zuzendaritzan dagoen hutsunea salatzeko asmoz. Gaur egun, ez dago zerbitzuen zuzendari nagusirik, eta kezka agertu dute egituraren barruan postu horrek orain arte izan duen «prekaritateari» buruz. 2017ko urtarrilean Euskal Elkargoa sortu zenetik, hiru zerbitzuburu izan ditu erakundeak. «Epe horretan, elkargoko zerbitzuek hamasei hilabete baino gehiago pasatu dituzte zuzendari nagusirik gabe. Egoera honek ezin du gehiago iraun», salatu dute sindikatuek elkarrekin egindako agirian.

Sindikatuen hitzetan, langileen ordezkariek behin baino gehiagotan dei egin diote Jean Rene Etxegarai Euskal Elkargoko lehendakariari, Elkargoko zerbitzuen zuzendari nagusiaren faltaz eta «ezegonkortasun kronikoari» buruz; «arrakastarik gabe». Horrez gain, giza baliabideen eta elkarrizketa sozialaren ardura duen Rene Carrique lehen lehendakariordearekin gaia aipatu izan dutenean, hark «gaia saihestu» izan duela salatu dute. Zuzendari faltaren arrazoiak zein diren argitzeko eskatu dute».

Hiru sindikatuek argitu dute elkargoko agenteek administrazioaren eguneroko gaiak «segitu, asumitu eta gauzatu» dituztela, baina, zuzendaririk gabeko «epe luzeak» elkargoaren funtzionamenduarentzat «biziki kaltegarriak» direla. Euskal Elkargoa zuzendaririk gabe egotea «onartezina» zaiela gainaratu dute CFDT, LAB eta CGT sindikatuek, «bereziki garai hauetan», COVID-19aren pandemiari erreferentzia argia eginez.