Hasi dira azkenik Artziniegako Artekalea berriztatzeko eta urbanizatzeko lanak. Duela lau urte Barrenkalerekin egin zen bezala, alde zaharreko kale hau konpondu egingo da, galtzada-harri berria ipiniz, espaloiak aldatuz edota argiztapena hobetuz. Lanotan miloi eta erdi euro baino gehiago gastatuko da.
Atzerapen batzuen ostean, atzo, hilak 21, hasi ziren lanak Artekalen. 2009. urte hasieran udarako iragarri ziren arren, baina 2010ean hasi dira, eta uda arte luzatuko ei dira. Aldundiarena den Arabako Lanak S.A. enpresak burutuko ditu lanok eta guztira 1.576.746 euro inbertituko dira, Aldundia eta Jaurlaritzaren aurrekontuetatik aterako direnak. Diru horretaz gainera, udalak beste 230.000 euroko sail bat aurreikusi du .
Artekaleko lanak hiru fasetan banatu dira: lehenengoa Barrekaleren elkargunetik Elizako Kantoiraino, bigarrena Mirefloresko Kantoiraino, eta hirugarrena Beratza Aldaparaino. Abian den lehenengo fasea apirilean burutuko ei da. Ondoren, kalea ez ezik, azokako plazaren beste aldean dagoen orubea ere urbanizatuko da, bai eta Kalearen amaieran dagoen Beratza aldapa ere, udalaren arabera,
Alde Zaharrean eraberritzen den bigarren kalea da Artekale, duela lau bat urte burutu ziren Barrenkaleko lanen ostean, eta asmoa da etorkizunean Goienkalen ere halako proiektu bat burutzea. Izan ere, iaz udalak alde zaharra biziberritzeko plan bat onartu zuen, Alde Zaharreko bizilagunak batzen dituen Urizahar auzo-elkarteak etengabe aldarrikatu bezala. Auzokideen aldarrikapen handienetako bat, horri dagokionez, trafikoaren arazoari irtenbide bat ematea izan da, ahal bada, ingurua trafikoari itxiz. Udalak konpromisoa hartu du horri ekiteko eta erregulazio-sistema bat ezartzeko.