Hamarkadak igaro dira erakundeen aldetik isiltasuna jaso besterik ez dugula. Gehienetan kasu bakan batzuk egon zirela aitortu dute, euren traje eta gorbatak zimeldu ez zitezen edo.
Hamarkadetan geure barruan gorde dugu, adierazpen txikienak ere, oinazearen ertzak berriz agertzen zizkigulako.
Hamarkada luzeak eman ditugu mina inorekin partekatu barik, eta latz ordaindu dugu.
Ilunetik argira ekartze horretan, hamarkadak eman ditugu amets gaiztoak sakon txertatuta ditugulako geure barrenetan.
Hamarkadak eman ditugu iluntasunetik argitasunerako bidean. Milaka eta milaka izen garraixi itoan hustuta. Eta askotariko izana duen sufrikarioan. Tortura jaso izanagatik, errundun sentsazioa paretik kendu ezinik.
Iluntasunetik argira eman ditugu urratsak, «Arg(h)itzen» dokumentala islatzen duen bezala. Laudion, azaroak 26, ostegunez, 18.30ean, Lamuza Parkeko Kasinoan egongo da ikusgai dokumentala. Urrats bakoitzak beste bat egiten duelako posible, aitortza eta ez errepikatzeko bermea dituen helmuga.
Hamarkadak daroaguz hari txikiak lotzen, komunitatea saretzen eta gu geu babesten, zaintzen... Bada ordua torturaz argi hitz egiteko.