mARABAtoia izenpean, euskarazko hitzek sorrarazten diguten emozioa partekatzera gonbidatu gaitu Aresketa ikastolak. Hitzordua hurrengo ostiralean da, maiatzaren 17an.
Erredakziora bidalitako prentsaurrekoan zehaztutakoaren arabera, ekitaldia goizeko 9etan hasiko da, herriko plazan jarritako oholtzatik Lehen Hezkuntzako haurrek eurek aukeratutako testutxoak irakurtzeari ekiten diotenean. Egunean zehar hainbat genero plazaratuko dituzte Aresketa ikastolako eta Amurrioko gainerako ikastetxeetako ikasleek.
Ikasleek ez eze, helduek ere parte hartu ahal izango dute, 16:30etik aurrera, hain zuzen. Prentsa oharrean dioenez, "gogo eta ausardia apur bat aski izango dugu oholtza gainera igo eta segundo batzuetan mikrofonoratzeko hain gustuko dugun olerki hori, amamak hainbat aldiz kontatutako ipuintxoak eta inoiz dardarazi gaituzten euskaraz entzun edo irakurritako esaldi horiek". Bereziki, Aresketa Ikastolako eskola-komunitatearen kide diren edo izan diren guztiak (gurasoak, ikasle ohiak...) eta baita ere gure herrian kultura, euskara, sormen artistiko edota literaturaren munduarekin lotura daukaten pertsona guztiak gonbidatu nahi dituzte antolatzaileek.