Euskal Mendizale Federazioak 37 urte daramatza Beteranoen Ibilaldia antolatzen. Urtero, federazioko talde bat arduratzen da zeregin horretaz eta, aurten, 50. urteurrena ospatzen duela-eta, Amurrioko Mendiko Lagunak taldeak antolatu du. Igande honetan izango da, EAEko hauteskundeen egunean.
Ibilaldia goizeko 8etan hasiko da herriko plazan. Inskripzioa doakoa da, eta egun horretan bertan egingo da, plazan, abiatu aurretik. Antolatzaileek 18 kilometroko ibilaldia prestatu dute.
Amurriotik abiatuta, Babio igoko behar da, Mendeikara jaitsi, eta Karduras errekastotik, Saratxora heldu. Saratxon hamaiketakoa eskainiko da. Gero Burubiora igo, eta Amurrion amaituko da ibilaldia.
Eguerdian, 14:30ean, bazkaria izango da Arenalde jatetxean. Bazkaltzera joan nahi duenak mendi-taldearen egoitzara deitu behar du ( 945 025 255, astearte eta ostegunetan 19etatik 21etara) edo mezu elektronikoa idatzi (mendikolagunak@mendikolagunak.com), eta 22 euro ordaindu.
Antolatzaileek adierazi digute ibilaldia ez dela soilik Federazioko beteranoentzat, eta mundu guztiak hartu dezakeela parte, haur, gazte zein heldu izan.