Urtarrilean Amurrioko Udalbatzaren osoko bilkurak aho batez onartu zuen Aiarako Kuadrillak kudeatzen duen zabor-partzuergoan sartzea.
Dena den, Amurrioko Bildu koalizioak, gure erredakziora bidalitako prentsa-oharraren bidez, adierazi du gertu-gertutik zainduko duela zabor-bilketaren kudeaketa mankomunatua. Halaber, azaldu du ez dutela inolako kalterik onartuko orain arte Amurrion zerbitzu hori ematen zuten langileen aurka. Izan ere, lanpostu horiek subrogatu egingo direla aurreikusita badago ere, Bilduk susmoa du ez ote den Lan Erreforma baliatuko lanpostu horietakoren bat amortizatzeko.
Hain zuzen, Aiarako Kuadrillak iragan maiatzaren 16an egindako osoko bilkuraren ostean egin ditu Bilduk adierazpen hauek. Bilkura horretan Kuadrillako aurrekontuak bertan behera gera daitezela eskatu zuen, “estimazio batzuk zuzenak ez zirela” argudiatuta. Halaber, erregu eta galderen atalean, Bilduk eskatu zuen Kuadrillaren egoitza Amurrion jar dadila behin betikoz. Haien esanetan, “erreklamazio historikoa da, eta alderdi politiko guztiek babestu dute, EAJk salbu”.