Aurtengo San Prudentzio jaietarako ekimen berri bat antolatu du Aiarako Udalak: Aiara Folk Rock Jaialdiaren I. edizioa, hain zuzen.
Jendaurrean jotzeko gogoa duten Aiara inguruko gazteen taldeei aukera bat eman nahi diete. Izan ere, antolatzaileen hitzetan, bi dira jaialdiaren helburuak: batetik, gazteen eta nerabeen artean sustatzea musikaren eta kulturaren balioa, eta, bestetik, talde berri gazteenei euren burua ezagutarazteko aukera ematea.
Edozein musika estilo jorratzen duten Aiarako edo inguruko musikariek parte hartu ahalko dute, taldean zein bakarka. Baldintza bakarra: kontratu diskografikorik ez izatea. Parte-hartzaileek 16 urte baino gehiago izan behar dituzte, eta adingabeek gurasoen edo tutoreen baimena beharko dute.
Aiara Folk Rock jaialdian lan berriak zein bertsioak abestu ahalko dira, 60 minutuz gehienez, eta ez da playbackik onartuko.
Izena emateko epea martxoaren 12an amaituko da. Aiarako udaletxera gerturatu eta eskabide-orri bat bete behar da, honako datu hauek ere zehaztuta:
- Taldekideen edo bakarlariaren izen-abizenak eta adina.
- Musika taldearen izena, musika estiloa eta emanaldiak zenbat iraungo duen, gutxi gorabehera.
- Helbidea, telefonoa eta harremanetarako helbide elektronikoa.
- Adingabeen kasuan, legezko tutoreek sinatutako baimena.
Eskabideak aurkezteko epea amaituta, Aiarako Udala jarriko da harremanetan izena eman dutenekin.
Erantsitako dokumentuan informazio gehiago aurkituko duzue.