Aiarako Udalbatza berriak bere lehenengo osoko bilkura egin zuen iragan ostiralean, uztailak 15. Bilkura horretan hainbat erabaki hartu zituzten. Esaterako, osoko bilkuren maiztasuna eta ordutegia finkatu ziren. Hilabetean behin egingo dira, hileko hirugarren ostegunean, arratsaldeko 7etan, betiere “herritarren parte-hartzea bermatzea helburu”. EAJ osoko bilkurak goizean egitearen alde azaldu zen, baina azkenean Gobernu Taldeak aurkeztutako proposamena aurrera atera zen.
Bestalde, Udaleko batzordeak ere zehaztu ziren; orotara, zortzi izango dira:
-Gizarte Ongizatea, Berdintasuna eta Immigrazioa
-Hirigintza
-Obrak eta Zerbitzuak
-Kultura, Kirolak eta Gazteria
-Euskara eta Hezkuntza
-Batzar Administratiboekiko Harremana
-Lehen Sektorea eta Ingurumena
-Ogasuna, Sustapen Ekonomikoa, Enplegua, Funtzio Publikoa eta Kontuen Batzorde Berezia
Aiara Batuz taldeko zinegotziek Herritarren Parte Hartzerako Batzordea ere sor dadila eskatu zuten, baina Bildu koalizioa buru duen Gobernu Taldeak adierazi zuen, hobe dela lehendabizi parte-hartze hori bideratzeko araudia adostea alderdi guztien artean eta, ondoren, batzorde hori eratzea bideragarria eta egokia den ala ez eztabaidatzea.
Dena den, Gobernu Taldeak argi utzi nahi izan zuen batzorde horiek Udalari antolakuntza formala emateko eratu direla, baina malguak direla, eta, egoki iritziz gero, aldatzeko aukera egongo dela.
Azkenik, alkatearen ordainsaria ezarri zen. Korporazioan liberatuta egongo den kide bakarra izango da, arduraldi esklusiboan jardungo du, eta 43.000 euro gordin jasoko ditu urtean. Aurreko alkateak 48.000 euro jasotzen zituen, gehi eskualdeko organoetan parte hartzeagatik ordaintzen zitzaizkion dietak. Egungo alkate Josu Artetxek dieta horiek jasotzeari uko egin dio. Halaber, aurreko legegintzaldian Hirigintza Arloko burua ere liberatuta zegoen, baina oraingoan liberazio hori desagertuko da. Ondorioz, liberazio horrek eragiten zuen 10.000 euroko kostua aurreztuko du Udalak.