Aiaraldeko Emakumeen Topaketaren VIII. edizioa izango da aurtengoa. Ekimen hori Kuadrillak antolatzen du, eta helburua eskualdeko emakume-taldeen arteko harremana sendotzea da. Hitzordua: abenduaren 14ean, asteazkena, 10:00etatik aurrera, Laudioko Kultur Etxean
Aurten Laudion elkartuko dira Aiaralde osoko emakume-taldeetako kideak, eta emakumeek zaintzaile gisa duten rola izango dute hizpide. Gaiari hainbat ikuspuntutatik helduko diote, esaterako: seme-alaben zaintzan duten zeregina, senide gaixoak zaindu beharra eta abar. Gaiaz hausnartzeko, bada, lan-talde txikiak eratuko dituzte. Gero, talde bakoitzaren ondorioak guztien artean eztabaidatuko dira, eta, azkenik, Jalgi-Surgir emakume taldeak gaiari lotutako antzerki-lana emango du.
Eguerdian, bazkaria izango da, 15 eurotan, baina kontuan izan ekimen honetan parte hartu nahi dutenek abenduaren 12a baino lehen eman beharko dutela izena. Horretarako, 945 156 147 telefono-zenbakira deitu beharko dute.
Argibide gehiago nahi izanez gero eskualdeko emakume-taldeekin jar zaitezkete harremanetan: Aurrerako (Amurrio), Hiriska (Artziniega), Eskoritas (Arespalditza), Gure Andere (Luiaondo), Ametsus (Okondo), Ama Birjina Zuria (Lanteno), Menagaraiko Emakume Taldea eta Laudioko Avillo, Solastiar eta Jakaranda.