Latiorron dagoen LANTZE zentroak adimen urritasuna duten pertsonekin lan egiten du. Bihar ate irekien jardunaldia antolatu dute, herritarrek han egiten duten lana bertatik bertara ezagut dezaten.
Laudioko hau Araban dauden mota horretako 9 zentroetako bat da. 18 eta 65 urte bitarteko pertsonek parte hartzen dute Lantze zentroan, eta, arduradunen esanetan, bertan egiten diren jarduera guztien ardatza “pertsona bakoitzaren ahalmenak garatzen lagunduko duen euskarri sarea antolatzea da, gizarteko kide baliagarria, aktiboa eta balioetsia izan dadin”. Helburua, azken batean, adimen urritasuna duten pertsonen eta euren senideen bizi kalitatea hobetzen laguntzea da.
Zentroan, guztira, 53 lagun dira: 41 erabiltzaile, 8 begirale, arduradun bat, pedagogo bat, gizarte langile bat eta psikologo bat.
Iaz bezala, zentroan egiten duten lana jendaurrean ezagutarazteko ate irekien jardunaldia antolatu dute biharko, azaroaren 29rako. Zentrotik zera esan digute:“gonbidapena, ezagutu nahi gaituen edonori luzatuta dago; bai Laudion bai inguruetan bizi zaretenoi ere”.
Hainbat ekimen antolatu dituzte: zentroari bisita, erabiltzaileek emandako hitzaldia, bideo eta argazki emanaldia, Txanogorritxu ipuin kontatua eta hamaiketakoa.
LANTZE zentroak egiten duen lan garrantzitsuaren berri bertatik bertara jaso nahi duenak beraz, hemen du aukera; hilaren 29an, asteartea, goizez (10:30-13:00) eta arratsaldez (15:00-16:30).