Gaur, urriak 11, Berdintasunerako Udal Espazioak bilera irekia egingo du Kultur Etxean 19:00etan. Besteak beste, Amurrioko kale eta plazen izenei eta monumentuei buruz egin den diagnostikoa aurkeztuko da, eta horren harira etorkizuneko kale eta plaza berriei emakumezkoen izenak jartzeko iradokizunak bildu nahi dituzte. Euren lana zokoratuta geratu bada ere, Amurrioko emakumeek ekarpen franko egin dizkiote herriari historian zehar eta, hain zuzen, egindako lana aitortzea da ekimen honen helburua.
Izan ere, gaur egungo kale eta plazen izenetan emakumeen presentzia urria da. Herriak 60 kale eta 8 plaza ditu. Horietatik gehienek toponimo baten izena dute. Gainerakoek, santaren bati eskainitakoak salbu, gizonezkoen izena dute (Dionisio Aldama, Lucas Rey edo Jesus Galíndez, besteak beste).
Bestalde, ez dago emakumezkoei eskainitako eskultura, busto, monolito edo dena delakorik. Egoera horri buelta emate aldera, beraz, herritarrek euren proposamenak egin ahalko dituzte gaur arratsaldeko bileran.
Bide batez, bilera horretan Emakumeen aurkako Indarkeriaren kontrako Nazioarteko Egunaren harira —azaroaren 25ean, hain zuzen— antolatu nahi diren jarduerei buruz ere hitz egingo da.