Amurrioko Ezker Abertzalearen aburuz, kirola funtsezkoa da egungo gizartean. Kirolari eta elikadura egoki bati esker, bizitza luzatzea lortu dugu. Kirolaren arloan orain arte egindako lanari esker, gero eta jende gehiagok egiten du kirola eta gero eta lehenago hasten dira, gainera. Agintari politikoen egungo erronka zera da: herritar guztiek kirola egiteko aukera izan dezaten bermatzea, nahitaez klub bateko kide izateko beharrik gabe. Horrek ez du esan nahi, baina, kluben lana alde batera utzi behar denik. Gakoa da errealitatea ongi aztertzea, kirola bere kabuz egiten duen jendea badela ikustea, eta, beraz, egoera hori bideratzeko moduak ezartzea.
Izan ere, kirola instalazio itxietan (kiroldegiak, gimnasioak eta abar) egiten duten herritarrak egon badaude ere, askok aire zabalean, kalean, egiten dute, eta hain zuzen, kaleko kirola ere kontuan hartu beharko luke Udalak Ezker Abertzalearen ustez. Jende askok paseatu egiten du, bizikletaz ibiltzen da... eta komeniko litzateke, beraz, bidegorriak eta naturbideak gaitzea. Halaber, interesgarria izango litzateke saskibaloia, areto-futbola, ping-ponga, skatea eta bestelako kiroletan aritzeko instalazio txikiak eraikitzea. Azken batean, gai horri buruzko azterketa sakona egin dadila eskatzen dute: falta denari antzematea eta Amurrioko Udalaren urteko aurrekontuetan hutsune horiek betetzeko partidak adostea.
Ezker Abertzalearen arabera, ezinbestekoa da zeharkako ekimen bat, Udaleko sail guztiekin koordinatuta (Hirigintza, Ogasuna, Administrazio Batzarrak, Auzoak, Berdintasuna, Kirola eta abar), aurrera eramatea. Ekimen horretan herritarrek ere parte hartu behar dute, eta helburuak kirolaren errealitatea planifikatzea eta kirol-ekipamendu egokiak eskaintzea izan behar du.
Haien ustez, funtsezkoa da ekintza hauek gauzatzea:
- Egungo instalazioak hobetzea eta berregokitzea: kiroldegia garestia da, ez da bideragarria, eta zortzi urte soilik baditu ere, zaharkitua geratu da.
- Kanpo-espazioak (kalea, mendia, auzoak, Administrazio Batzarrak...) kontuan hartzea eta kirol-ekipamenduz hornitzea.
- Besteak beste, kaleko kirol-ibilbide horiek ongi argiztatzea, erabiltzaileak seguru senti daitezen.
- Ikastetxeetako kirol-instalazioak erabiltzeko aukera ematea. Horretarako, akordioren bat lotu beharko da Hezkuntza Sailarekin.
Kirola, azken batean, gai garrantzitsua da, osasuntsua izateaz gain, osasun psikikoa, autoestimua eta bizi-kalitatea hobetzeko balio du-eta.