Amurrioko Virgen Niña ikastetxeak Bikain ziurtagiria jaso berri du Donostiako Kursaal Jauregian antolatutako ekitaldian.
Bikain ziurtagiri ofiziala, publikoa eta doakoa da. Eusko Jaurlaritzak ematen du, eta enpresa nahiz erakunde batean euskararen presentzia, erabilera eta kudeaketa egiaztatzen ditu.
Ebaluazio bat egin ondoren eskura daitekeen ziurtagiria da, hortaz. Ebaluazio horretan EMEn (Erreferentzia Marko Estandarrean) jasotako itemak zein hizkuntzatan dauden eta nola kudeatzen diren egiaztatzen da, besteak beste. Ebaluazioari dagokionez, EMEk lau ardatz ditu:
Erakundearen komunikazioa eta irudi korporatiboa
Kanpo harremanak
Barne harremanak
Hizkuntza kudeaketa
Aiaraldea.com-ek Virgen Niñako euskara arloko arduradunei galdetu die azken urteetan zer urrats egin dituzten euskararen normalizaziorako bidean. Hona hemen haien erantzuna:
“1998an B eredua ezartzeari ekin genion. Horrek ahalegin handia eskatu zigun irakasleen euskalduntze eta materialen egokitzapenaren alorretan. Aipatzekoa da mojek euskararen alde egin nahi izan zuten apustua. B eredua ezartzeaz gain, esfortzu handia egin zuten erlijioari lotutako ekintzetan euskara bultzatuz.
Irakasleen ohitura aldaketa arrakastaz gauzatutako erronka izan zen, eta aurrerapauso horien guztien lehenengo emaitza Bai euskarari ziurtagiria izan zen. Xede horretara heltzek, lehen pausoa ikasleen artean giro euskalduna sortzea izan zen, beraz, motibatzeko jarduerei ekin genien (euskararen astea, Gabonetako jaialdian euskara txertatzea…).
Urteetan zehar egindako lan horri jarraipena emateko asmoz, 2005ean Ulibarri Programa martxan jarri genuen, euskararen normalizazioa helburu. Programa horrek arlo askotan eragin du. Garrantzi handia eman zaie, besteak beste, ikasleen ezagutza eta erabilera sustatzeko ekintzei eta dokumentazioa euskaratzeari. Bestetik, gurasoak ere inplikatu nahi izan ditugu eta programan parte hartzen dute, ekintzak diseinatu eta baloratuz. Gainera, Guraso Elkarteak diruz laguntzen ditu ikastetxean egindako ekintza asko, eta eskolaz kanpo egindako jarduerak ere bai.
Horren guztiaren emaitza Bikain ziurtagiriaren lorpena izan da, eta euskararen normalizazioan urrats gehiago lortzea da egun ere ikastetxearen helburu nagusienetariko bat”.