aiaraldea.eus

(Nire) gurasoei

Erabiltzailearen aurpegia Izar Mendiguren Cosgaya   Iritzia

Aritz Larreta Bereziartua irakasleak  www.atarian.info webgunean argitaratutako artikulua. Ederra.

Ez iezadazue eskatzen dizuedan guztia eman, gehienetan, zenbat emateko prest zaudeten ikusteko bakarrik eskatzen dizuet eta.

Ez iezadazue oihurik egin,

gutxiago errespetatzen zaituztet horrela egiten duzuenean.

Gainera, neuri ere oihu egiten irakasten didazue

eta ez dut horretan ikasi nahi.

Ez iezazkidazue uneoro aginduak eman;

aginduak eman ordez, gauzak eskatu egingo bazenizkidate,

azkarrago eta gusturago egingo nituzke.

Emandako hitza bete,

nola sari hala zigor baten gaineko hitza bada.

Ez nazazue inorekin konparatu,

eta, batez ere, nire anaia-arrebekin.

Beste norbait baino hobea naizela sinestarazten badidazue,

besteren batek sufritu egingo du;

aldiz, beste norbait baino eskasagoa naizela sinestarazten badidazue,

ni neu izango naiz sufrituko duena.

Ez ezazue nik egin beharko nukeenaren gaineko iritzia

hainbestetan aldatu: har ezazue erabaki bat eta eutsi horri tinko.

Utz iezadazue nire kabuz moldatzen, nire ordez beti zuek egiten baduzue,

ez dut-eta inoiz ikasiko.

Ez ezazue nire aurrean gezurrik esan,

ezta nik hala egin dezadan eskatu ere.

Zerbait gaizki egiten dudanean,

ez iezadazue galdetu zergatik egin dudan,

gehienetan, nik neuk ere ez dut jakiten eta.

Oker zabiltzatenean, aitor ezazue;

horrek neure huts egiteak aitortzen lagunduko baitit.

Ez iezadazue zuek egiten ez duzuen zerbait egiteko agindu;

izan ere, zuek egiten duzuen hori bera ikasiko baitut nik.

Irakats iezadazue maitatzen,

eskolan horretan saiatzen badira ere, zuengandik ikusten eta sentitzen ez badut,

alfer-alferrik izango da eta.

Arazo edo zalantzaren bat dudanean, mesedez eskatzen dizuet,

ez iezadazue esan entzuteko tarterik ez duzuenik

edota gertatzen zaidan horrek garrantzirik ez duenik;

ahal duzuen neurrian, baina saia zaitezte ni ulertzen eta laguntzen.

Eta, bukatzeko, maita nazazue erotzeraino eta, are gehiago,

adieraz iezadazue maite nauzuela;

nahiz eta akaso zuei ez hala iruditu,

niri gustatu egiten zait-eta hori entzun eta sentitzea.

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa