Guardian enpresako zuzendaritzak enplegu erregulazio expediente (EEE) berri bati heltzeko asmoa du irailean. Herenegun batu ziren enpresa eta langileen batzordea urtarrilean adostutako hitzarmena berritzeko. Ixteke dagoen akordioa, beraz, 2014ko urtarriletik aurrera aplikatuko litzateke.
LABek salatu duenez, enpresak agertutako asmoei eutsiz gero lan baldintzak eskastuko liratezke. Alabaina, bileran ez dute Guardianen etorkizuna ebatzi. Lantegiak txosten ekonomiko bat egiteko konpromezua hartu du, irailaren 2an aurkeztu eta zer egin erabakitzeko. ELAk, bestalde, patronalak langileen soldata jaisteko asmoa kritikatu du. Izan ere, abuztuaren 30etik aurrera %7,14 murriztuko diete lan-saria. Josean Fernandez langile batzordeko kideak aspalditik eskatzen ari direla oraindik iritsi ez den auditoria ekonomikoa adierazi du, eta EEE berriak 400 pertsonari eragingo diola ohartarazi.
CCOO sindikatuak, bestalde, beiraren merkatuak jasandako beherakada eta patronalak Guardinanen izandako funtzionamendu txarra asumitzen duela aitortu du. ELAk eta LABek, ordea, gardentasun falta egotzi diote fabrikako zuzendaritzari. Langileek diotenez, Guardian Llodio enpresak Tuteran duen fabrikan ere antzeko murrizketak egingo dituztenaren susmoa dute.