Eguerdiko 12:00etan jaurti dute Laudioko jaiei hasiera ematen dien txupina. Aurten, Bihurriak kuadrila izan da suziria pizteko arduraduna, emakumez osaturiko lehen kuadrila hain zuzen ere. Goizeko 10:00etatik jende mordoa bildu da kaleetan zehar jai giroa hedatuz. Jaiak Koordinakundearen deialdiari jarraiki, kuadrila bakoitzak bere lema eta irudi propioz osatutako pankarta atera du.
Aldarrikapenak nonahi
Aldarrikapenek ere izan dute tarterik. Emaion emakumeen talde feministak, esaterako, fotomoretoia antolatu du herri eta jai parekideen alde. Herrirak, aldiz, preso eta iheslariak etxeratzea aldarrikatzeko kontzentrazioa egin du herriko plazan.
Urrezko katxia
13:00etan ireki da txosnagunea. Aurten, lehenbizikoz urrezko katxia banatu dute. Hala, Tuntturro zanpantzar taldeak eskuratu du jai herrikoien alde egindako lanaren aitortza.
Pregoilaririk ez
1992tik aurtengoa izan da pregoilaririk gabeko jai bakarra. Izan ere, herritarrek Pablo Gorostiaga aukeratu zuten pregoilari, baina agindu judiziala medio debekatu egin zuten beronen irakurketa. Horren aurrean, ekitaldi xume bat egin zuten atzo herriko plazan, pregoia irakurtzeko unean bost minutuko isiltasuna egin zutelarik. 500 lagun inguruk hartu zuten parte.