Laudioko San Roke jaietako egitaraua aurkeztu zuten atzo. Prentsaurrean txupinerak izango diren Kilkerrak taldeko ordezkariak, Pablo Gorostiagaren alabak, Esti Angulo kartel egileak eta Jai Batzorde Paritarioko kideek hartu zuten parte. Baita EAJ, Bildu eta Omniako zinegotziek ere.
Pablo Gorostiaga pregoilari izateagatik oso pozik dago, alabaren hitzetan. "Pabloren partez proposatu eta bozkatu duten guztiei eskerrak eman behar dizkiet. Eskertua dago, ilusionatuta. Pregoia egitena hasi da. Ihesaldi fisikoa ezin bada ere mentala egingo du. Oso pozik dago". Inma eta Placi Bihurriak taldeko kideak ere grinatsu azaldu dira: "Gogotsu gaude.Gutxi gara baina beti ikusi gaituzte kalean". 1987an sortu zuten jai kuadrila, emakumez osatutako lehenengoa izan zen.
Bi txanda
Aurtengo jaiak bi txandatan ospatuko dira. Abuztuaren 15ean jaurtiko da txupina, eta 17 bitarte hamaika ekitaldi egongo dira. Bigarren txanpari abuztuaren 23an, Berakatz egunarekin helduko diote. Ondotik etorriko dira kuadrilen eguna, baserritarrena, odolosteena eta kofradiarena. Abuztuaren 26an amaituko dira festak, Roketxu txakurraren erreketarekin.
Jai egunetan kalejirak, antzerkiak, jolasak... ikuskizun mordoa prestatu dituzte. Horien artean daude Deabru beltzak konpainaren "Les tambourde Feu" emanaldia eta Bebe zein Bongo Botrakoren kontzertua. Txosnagunean, aldiz, Honat taldea, Willis Drummond, KOP; En Tol Sarmiento, Izargi, Itziariren Semeak, Tximeleta, Skasti, EH Sukarra, Atxurre eta diskodatnza izango dira.