Pablo Gorostiaga aukeratu dute Laudioko jaietako pregoilari. Iaztik, herritarrek proposatu eta bozketa bidez erabakitzen dute zein norbanako edo eragile izango den festetako omendua. Udalak jakinarazi duenez, aurten 21 proposamen egin dira, eta horietatik bozkatuena Pablo Gorostiaga izan da.
Amets Meazak adierazi duenez, aukeraketa bi fasetan egin da. Batetik, herritarrek, zuin aldizkariaren bidez proposamenak egin dituzte. Bestetik, ekainaren 18an alderdi politiko, jai kuadrila eta kultur teknikariarekin egindako jaietako asanblada irekian hautagaiak aztertu eta batzuk baztertu zituzten: "Aiton-amonen kolektiboa, aurrez pregoilari izandakoak...". Ekainaren 19ko jai batzorde paritarioan egin zen bozkaketa erabakiorra, sei udal ordezkari eta sei herritarrekin. Ondorioz, Pablo Gorostiaga izango da aurtengo jaietan herritarrek aukeratutako ordezkaria.
"Pregoia nola egin Pablok eta familiak erabakiko du, orain arte egin den bezala", azaldu du Meazak.
Gorostiaga urte luzez izan da Laudioko alkate. 71 urte ditu eta egun Herrera de la Manchako espetxean dago preso, 18/98 auzia dela-eta. Kondenaren hiru laurdenak beteta dituela-eta, kalean egon beharko luke.