ELENE ALLENDE (Laudio, 1988) Tuntturro zanpantzar taldeko kidea da. Ekainaren 29an Laudion ospatuko dute Euskal Herriko joaldunen eguna.
EHko joaldunen eguna ospatuko da Laudion ekainaren 30ean.Nolatan sortu zen aukera?
Azken gauzak jasotzen eta prestatzen gabiltza, baina bai. Ekainaren 29an ospatuko dugu joaldunen eguna. Zanpantzar taldea duten herrietan urtero ospatzen da. Nafarroan egiten da gehienetan eta aurten guk eskatu genuen hemen antolatzea.
Zerekin egingo du topo bertaratzen denak?
San Pedropeko jaiekin koinziditzen duenez goizean sukalki lehiaketa egongo da. Ondoren herri bazkaria eta arratsaldean zanpantzarren kalejira. Euskal Herri osoko taldeak etorriko dira. Gero, herri afaria egongo da, eta amaiera emateko erromeria.
Zenbat eta nongo jendea espero da?
50 joaldun inguru espero ditugu. Arabaz gain, Nafarroatik ere etorriko dira. Iruñeako Txantrea auzotik, Alde zaharretik, Donibanetik... Irurtzunetik, Gasteizetik eta Beasainetik ere hurbilduko dira. Bizkaitarrik ez dugu,konfirmatuta baina aukera dago.
Noiz sortu zen Tuntturo taldea?
2005ean. Laudion mutil kuadrila bat zegoen, eta bati okurritu zitzaion ideia. Lagunei esan, txosnak jarriz eta haien poltsikotik dirua atera zuten eta Berriozarreko zanpantzarrekin hitz egin zute. Haiek, materiala utzi zieten, frogatu, erakutsi.... eta horrela sortu zen taldea!Gaur egun 15 gara, 12 mutil eta bi neska.
Emakume zanpantzarrak gero eta gehiago zarete... Edo gizonezkoen ekintza da oraindik?
Gizonezkoen ekintza ez nuke esango denik, emakumeak gutxiago gara baina talde guztietan ikusten dira adin guztietako neskak. Gu 19 urterekin sartu ginen, eta 40 urte inguruko neskak ere aritzen dira. Beraz, denetarik dago.
Zure kasuan, zerk erakarrita hurbildu zinen zanpantzarren mundura?
Gure taldeko mutilak neska bila zebiltzan. GUrekin hitz egin eta lagun batekin arazorik gabe apuntatu ginen.
Zer jakin behar da zanpantzar gisa aritzeko?
Koordinazio eta erritmoaz gain aurrekoa jarraitzea da egin behar den gauza bakarra. Batez ere, ondo pasatzeko gogoa da behar dena. Taldena parte hartu nahi duenak ekainaren 29an kalejira aurretik edo ondoren gugana hurbildu dadila! Orain talde txiki bat ari gara prestatzen, noizean behin tailerrak eta entsaioak egiten ditugu. Orain, eguraldi ona etorriko denez entsaio gehiago egingo ditugu.
Zergatik joan beharko luke jendeak joaldunen festara?
Lehen aldia delako Laudion ospatzen duguna eta ez dakigulako noiz errepikatuko den honelako egun bat. Euskal kultura bultzatu nahi dugu, eta zanpantzarren ohitura bultzatzeko aukera paregabea da. Animatu zaitezte denak Laudiora!