Goizeko 05:30ean hasi dira pikete informatiboak enpresa ezberdinetan. Aurrenekoz, nork bere lantegira jo du grebaren arrazoiak azaldu eta lankideei mobilizatzeko deia luzatzeko. Laudioko Guardian lantegiko langileen esanetan, zerbitzu minimoetaz gain 15 bat behargin joan dira lanera. Guztira 600 lagunek osatzen dute bertako langilegoa, beraz, greba orokorrak eragin handia izan duela nabarmendu dute.
Aiaraldeko grebalariak Laudioko Gurutze Gorrian elkartu dira 06:30ean. Bertan, bi taldetan banatu dira Laudio eta Amurrioko industriaguneetara joateko. Amurrioko Aldaiturriaga poligonoan enpresa gehienak itxita egon dira. Baita Laudioko Arza industriagunean ere. Laudioko Lidl eta Gardeako enpresa batean langile batzuekin eztabaida eta tentsio uneak egon dira. Ertzainek Laudion kamaraz banan-banan grabatu dituzte grebalariak.
Amurrion Inauxa, Gometegi, Colsa, Kider eta JEZ enpresak itxita daudela adierazi dute sindikatuek. Amurrioko udaleko langileen %85ak egin du grebarekin bat. Banketxe eta supermerkatuek pikete informatiboak pasa ostean ixtea erabaki dute. Horien artean daude Eroski, Berriak eta Dia.
Okondon eta Artziniegan oso eragin txikia izan du grebak. Orohar, normaltasuna dela nagusi adierazi dute herritarrek. Urduñan BBK eta supermerkatu bat baino ez da ireki. Alabaina, grebalarien azalpenak eta gero grebarekin bat egin du banketxeak.
Zortzi identifikatu
Murgako industriagunean lau gazte identifikatu dituzte. Laudioko herrigunean, berriz, bi. Horrez gain, azpimarratzekoa da Aiaraldea Komunikazio Leihoko bi kazetari identifikatu eta irudien erabileraren arduradun pertsona horiek direla egotzi izana.