Gaur goizaldean Laudion izandako hilketa matxistaren aurrean Orozkon, Laudion, Amurrion eta Arakaldon ekimen ugari egin dira. Orozkon, 18:45ean ez-ohiko udalbatza deitu dute, eta 19:00etan kontzentrazioa. Gazte mugimenduak bat egin du deialdiarekin.
Laudion, aldiz, 14:00etan herri eragileen asanblada egin dute. Bertaratu direnek genero indarkeria salatzea ez dela instituzio eta alderdi politikoen lana soilik nabarmendu dute. Hala, datozen egunetan indarkeria matxistaren aurrean nola jokatu zehaztuko duen herri hitzarmena egitea erabaki dute. 19:30ean ez ohiko udalbatza egingo dute, eta ondoren, kontzentrazioa.
Arakaldoko udalak ere erasoa salatu du. Amurrion, aldiz, 19:00etan kontzentrazioa egin dute.
Eragile sozialak
Parekidetasunaren aldeko Aiarako Biok gizon taldeak hilketa gaitzetsi eta salatu du: "Emakumeen kontrako indarkeria emakume eta gizonen arteko ezberdintasunaren ondoriorik larriena da". Gaineratu dutenez, erasoaren arrazoia ez da naturala, kutlurala, soziala, politikoa... baizik. "Matxismoa eta sexismoa gure gizartean hedatuta dago. Era honetako hilketak onartezinak dira". Haatik, erasoa salatzeko deialdietara bertaratzeko eskatu diete herritarrei.
Euskal Herria
Eusko Legebiltzarrean ere Laudioko hilketa gaitzetsi dute, gaur goizean, osoko bilkura hasi baino lehen. Minutu bateko isilunea gorde dute. Emakundek, Iñigo Lamarka arartekoak eta EHbilduk ere egin dute salaketa. Euskal Herriko emakumeen mundu martxak bihar kontzentrazioa egingo du Donostin. Irunen ere mobilizazioa egingo dute.