Espezie inbaditzaileen garbiketa egingo dute larunbatean Arrankudiagan. Egitasmoa, Udaltalde Nerbioi-Ibaizabalek antolatu du. Gaineratu dutenez, egitasmoa 10 udalerritan egitekoak dira. Horietatik lau, Aiaraldean daude: Orozko, Urduña, Arakaldo eta Arrankudiaga.
Larunbatean, Arrankudiagan
Larunbatean ekingo diote Aiaraldeko ibai eremua sendatzeari. Hitzordua 9:30ean izango da Arbide auzoan. "Reinoxmetal enpresaren parean gara. Bolondres gisa lanerako prest dagoen edonor etorri liteke", adierazi dute. Alabaina, arropa eta oinetako eroso eta egokiak eramateko gomendatu dute.
Asmoa, Nerbioi ibaiak Arrankudiaga igarotzen duen eremuan dauden landare inbaditzaileak kentzea da. Horien artean daude artemisia verlotiorum, cortaderia selloana, arundo donax, budeja davidi, besteak beste. Era honetan nahi dute biodibertsitatea mantentzea eta fauna zein florarentzat paisaia naturala bermatzea.
Horretaz gain, ibaiaren inguruko zaborra jasotzen ere arituko dira. Antolatzaileek, auzolanaren iraupena hiru ordukoa izatea espero dute: "Jendea informatu eta sentsibilizatzeko kartela ere jarriko dugu". Lanari ekin aurretik ibaiaren ezaugarriak eta inguruaren balioak azalduko dituzte. Baita espezie inbaditzaileek sortzen dituzten arriskuez mintzatu ere.