Okondoko udalak aurrekontuak onartu ditu. Sergio Tato alkateak udalaren egoera ekonomikoaren balantze positiboa egin du: "Iazko likidazioarekin ekintza inbertsioak egingo ditugu. Ia 200.000 eurorekin bukatu dugu urtea, eta horrekin egingo dugu lan aurten". Besteak beste, udaletxeko erreforma eta jubilatuen etxeko lehioak konponduko dituzte. Eta, kultur etxerako aulkiak, mahaiak... erosi.
Udaletxeko erreforma
"Osasun zentroa egin da, baina bulegoak ondo banatzeko moldatuko da eraikina", azaldu du alkateak. Udaletxeak dituen hiru solairuak komunikatzeko igogailua jarriko dute, eta bulegoak lehenengo solairuan ipini. "Legea beteko dugu, solairu guztietara iristeko arazoak baitaude; eta lekua hobeto aprobetxatuko da". Era honetan nahi dute irisgarritasuna hobetzea. Tatoren esanetan, erreforma Foru Aldundiko planetan dago. Gastua 400.000 eurokoa izango da, "baina prezioa jaistea espero dugu". Momentuz, dirulaguntzen %60 jaso dute: "Foru Aldunditik dirulaguntza eman digute, baina espero dugu Eusko Jaurlaritzakoa ere jasotzea".
Lanek, sei hilabeteko iraupena izatea espero dute. Horregatik, obrak dirauen bitartean kultur etxera mugituko dira udal langileak."Bertako solairu bat bakarrik erabiliko dugu, bizitza soziala ez aldatzeko", zehaztu du.
Herrian aldaketak
Udaletxekoa, ordea, ez da izango aurtengo berrikuntza bakarra. Jubilatuen etxeko konponketara 35.000 euro bideratuko dira: "Leihoak eta solairuak aldatuko dira, gero dagoen diruaren arabera ikusiko dugu zer egin daitekeen". Kultur etxea atontzeko mahaiak eta aulkiak erosiko dituzte, eta komuna konpondu. Igerilkuan, aldiz, taberna janaria emateko taberna konponduko dute, eta komunak irisgarritasuna izateko moldatu.
Krisi ekonomikoari erreparatuta balorazio ona egin du alkateak: "Garaia ez da ona eta beharrezkoa prudentea izatea".