BEA ISASI (X) bolo taldeko lehendakaria da.
Aiarako taldea Euskadi mailako txapelketan dago...
Bai, hala da. Araban ari gara lehiatzen orain. Bi egun daramatzagu bolotara jolasten, hiru falta zaizkigu, erdiak baino gehiago. Aiarako taldean jokatzen dugu guk, Kexaan dugu egoitza.
Nolakoa da bolo jokalariaren egunorokotasuna?
Normala. Asteburuetan boloetan jolastera joaten gara, txapelketa ezberdinetan jolastera. Tarteren bat badugu entrenatu egiten dugu astean zehar. Txapelketa bi orduko gauza izaten da, orduan ez du aparteko inplikaziorik eskatzen egunerokoan.
Emakumeek bolotara jokatzea arrunta da?
Urduñako taldean bolo jokalari bat dago, Okondokoan bi neska eta LUxaondon aurten beste bi hasi dira. Aiaraldean sei gara. Guztira 60 bat. Emakume zein gizon denak gara lagunak.
adfa
Aurreko lehendakariak karguarekin ez zuela jarraitu nahi esan zuen. Guztion artean bozkaketa egin eta taldeko kide guztien artean erabaki zen lehendakaria ni izatea.
Nola hasi zinen kirol honetara?
Kasualitatez. Bolatoki alboan txoko moduko bat dugu eta aitak musean bertan jokatzen zuen. Neskak ere zeudela ikustean bera animatu beharrean ni animatu ninduen. Aitak ez zuen boloa ezagutzen baina ikusi eta gustatu egin zitzaion. 6-7 urte izango dira jolasten hasi nintzenetik.
Emakumeen aldetik bilakaerarik nabaritu duzu bolotan?
Aiarako taldean bazegoen beste bolo jokalari bat. Nire aurretik Urduñako neska batek, Gurutzek, ere jolasten zuen. Arabakoen artean liga moduko bat egiten dugu. Lehenengo 15ak Euskadiko txapelketara sailkatzen dira. Lehia gizonezkoekin batera egiten dugu. Euskadiko txapelketara probintzia bakoitzetik orain hiru neska joaten dira.
Alde batetik, emakumeak banatzeak jendea animatu dezakeelako pozten nau. Baina batzuk haserretu egiten dira emakumeok preferentzia dugula-eta.
Eskualdean izango da beste lehiarik?
Euskadiko txapelketa Tertangan jokatuko da ekainaren 8an. Sailkatuko direnen zerrenda laster jakingo dugu, Aiaran dauden 10 bolatokien partidetan lortutako puntuak batu eta zerrenda ateratzen baita. Aste batzuk barru jakingo dugu Euskadiko txapelketara sailkatzen garen edo ez.