Emakumearen nazioarteko eguna dela-eta, egitarau bateratua antolatu dute Laudioko eragile ezberdinek. Udalaren Berdintasun Taldeak iaz ekin zion herriko kolektibo ezberdinekin lanketa eta egitaraua bateratzeari. Astelehenean egin zen bilerara Jakaranda, Avillo, Solastiar, Biok, Laudio BHI, Laudioko Gazte Asanblada eta Aiaraldea Komunikazio Leihoa bertaratu ziren. Martxoan zehar garatzeko hamaika ekitaldi prestatu dituzte.
"Ez da kasualitatea" lemapean, esaterako, bertso saio musikatua egingo da Kultur etxean. Martxoaren 7an, aldiz, maratoi baten lekuko bilakatuko da Euskal Museo Gastronomikoa. Izan ere, 55 minutuko tailer ezberdinak eskainiko dira: oinarrizko joskintza tailerra, janari soberakinen berrerabilpena, masaia...
Martxoaren 8an Solastiar taldearekin batera eragile guztiek deitu dute 13:00etan Lamuza plazan egingo den kontzentrazioa. Iluntzean, Gazte Asanbladak emakumeen musika taldeekin kontzertuak egingo ditu gaztetxean. Laudioko Zukguak, bestalde, bi hitzaldi antolatu ditu. Batetik, "Gazteak eta sexu harremanak" jorratuko dituzte kultur etxean, eta bestetik, "Gazteak eta genero harremana".
Heziguneak ekintzaz blai
Laudioko BHI institutuan ere ekitaldi desberdinekin landuko dute berdintasuna martxoan. Batxilergo artistikoko ikasleek, esaterako, marrazki bidez islatuko dute parekidetasunaren beharra, heziguneak lehiaketa antolatu baitu. Batxilergoko ikasleek, aldiz, hiru kultura ezberdinetan emakumeak bizi duen egoera azalduko dute gelaz gela powerpoint bidez. Horretaz gain, triptiko eta eskumuturreko moreak banatuko dituzte institutuan zehar. Aurten, Katixa Agirre idazlea izango da Laudio BHIko gonbidatua. Heziguneko gazteen aurrean emakumeak literaturan duen egoeraz hausnartuko du.
Autodefentsa ikastaroa
Martxoaren 9 eta 10ean, emakumeentzako autodefentsa ikastaroa egongo da Granja kiroldegian. Interesa duen orok izen ematea aurrez egin beharko du udaleko Berdintasun Arloan. Martxoaren 9an, Jakaranda elkarteak bazkaria, dantzaldia eta bakarrizketa saioak eskainiko ditu Andaluziar etxean.
Martxoaren 14an, tratau txar emozionala ardatz duen "Palabras" antzezlana egongo da Laudioko Udal Lanbide Heziketa eskolan.