Laudioko udalak abiatutako ekimenaren emaitzarekin pozik agertu da Natxo Urkixo alkatea (Bildu). Laudioko behar zein moldaketen lehentasunak erabakitzeko inkesta prozesu bat abiatu zuten udazkenean zehar. Nola paperez hala internetez 1062 inkesta orri bildu dituzte. Adierazi dutenez, 825 ale jaso dituzte udalerriko hainbat tokitan sakabanatutako postontzietan. 237 ekarpen, aldiz, internet bidez egin dira.
Erdigunean 324 inkesta bete dira, Latiorron 222, Aretan 159, Ugarten 132, Landaluzen 107, Gardean eta Landa eremuan 39 eta Arrañon 38. Orain, emaitzak aztertu eta herritarrek erabakitako lehentasunei erantzungo diete. Natxo Urkixok azaldu duenez, abenduaren 3tik aurrera abiatuko dute auzo asanbladen bigarren zikloa. "Ekimen honen ondorioek 2013ko aurrekontuak partehartzaileago bilakatzen dituzte", adierazi du. Udalak eskertu eta zoriondu egin ditu ekimenean lagundu duten herritarrak, alderdi politikoak, udaleko langile teknikoak, auzo batzarretako jarraipen batzordea, goxotxu denda, Lamuza parkeko kultur etxea, udal liburutegia ,HAZi, Tokiko Garapen Agentzia, Gardeako gizarte zentroa, Arantzar liburudenda, Aretako kultur etxea eta Santa Anako zentro soziokulturala. "Laudio guztion artean eraikitzen lagundu dutelako".