"Hunkituta". Hala hasi zuen atzo, haren hitzetan, EhBilduko ekitaldia Laura Mintegi lehendakarigaiak. Aldai plaza jendez lepo zela, politika egiteko bi modu izan zituen hizpide: kapitalaren edo herritarren intereserako lan egitea: "Enplegua sortu behar dugu, dagoena banatuz eta berria sortuz". Lana sortzeko jubilazio adina gutxitzea, errelebo kontratuak egitea proposatu zuen:"inor ez dadila kalera joan ez langabezian egon. Arazoa ez da dirurik ez dagoela, txarto banatua dagoela baizik. Murrizketak egin behar dira, baina azpiegitura eta pribilejioetan". Diru horrekin ezkerreko politika garatu behar da Mintegiren aburuz, "politika soziala".
Politika eredu desberdina
Ekonomia egiteko bi eredu aipatu zituen lehendakarigaiak: EAJ, PSE zein PPrena; eta EhBIldurena. "Guk pertsona hartzen dugu ardatz, eta ez botere espekulatiboa. Inondik inora ez ditugu onartuko Madriletik datozen murrizketa antisozialak, pertsonak lehenesten ditugulako; ez kapitala". Amiantoaz ere aritu zen; "Sestaon aurrekoan amiantodun pantanotik etxeetara ura bidaltzen ari dira. Hori da haien modeloa, kapitala, irabaziak, dena pribatizatzea...eta pertsonak erabili eta botatzea".
Pribatizazioa ere kritikatu zuen: "hezkuntza, osasun zerbitzua, garraioa.. pribatizatzeari ekin diote. Etxea dirua dutenek soilik eskura lezakete, sosik ez dutenak etxeetatik botatzen dituzte. Jende guztiarentzako zerbitzuak eskaini behar dira, dirua izan edo ez, Euskal Herrian dauden bitartean euskaldunak dira". Etxebizitzaren alorrean, familia bakoitzaren irabazien %15 gaindituko ez duen alokairu soziala proposatu zuen, eta ikasleek unibertsitatera joan ahal izateko diru laguntzak areagotzea. Egoeraren aurrean sektore publiko indartsua osatzearen beharra azaldu zuen: "Bestela dena pribatizatuko dute. Progreziodun fiskalitatea behar da hemen, diru gehiago duenak gehiago ordaindu behar du, eta gutxiago duenak gutxiago. Hori da EhBilduren eredua".
Aiaraldeko ikasle abertzaleek zehaztu zituzten hezkuntzaren murrizketek ekar litzazketen ondorioak. Ikasleen grebaren harira, Bilbon izandako karga polizialak salatu zituen: "Herria babestuko duen polizia behar du, horregatik hitz egiten dugu Hiritar Askatasunaz, ez Barne Sailaz. Guk ikusten dugun ertzaintzak herriaren zerbitzura egon behar du, ez ertzaintza probokatzaile edo zapaltzailea. Poliziak askatasun indibidual eta kolektiboak babestu behar ditu, ez ikasleen eskubideak suntsitu. Ikasleek eskubidea dute hezkuntza sistema askea, bekak...eskatzeko. Inongo poliziak ez luke hori debekatu behar, inondik inora".Herrerera de la Manchan preso dagoen Pablo Gorostiaga aretarrari elkartasunezko txalo zaparrada bat bidaliz bukatu zuen hitzaldia.
Azoka eguna izaki, atzo, alderdi politiko nagusi gehienak atera ziren kalera. EAJk, propaganda eta txistorra banatu zituen plazan. PPk, goiza azokan zehar herritarrekin egon eta programa banatzeko baliatu zuen. Eta, egungo lehendakari den Patxi Lopezek (PSE) Laudioko udal lanbide heziketa eskola eta Amurrioko Tubos Reunidos enpresa aukeratu zituen adierazpenak egiteko.