Laudioko udalak merkataritza sustatzeko teknikariaren kontratua ez berritzea atzerapausotzat jo du APILL dendari elkarteak. Izan ere, orain arte jorratutako ildoetako bat instituzioak sentsibilizatu eta herriko enpresariak babesteko egitura sortzea zen. Haatik, 2007tik merkatarien elkarteak proposatutako ekimenak aurrera eramateko teknikari bat izan dute udalean. Prentsa oharrean azaldu dutenez, besteak beste, formakuntza, merkatarien dinamizazioa eta aholkularitza zerbitzuak bermatzen zituen teknikariak.
APILLen arabera, sektoreari dagokion politika garatzeko ezinbestekoa da merkataritzan, ostalaritzan zein bestelako eremuetan aditua den teknikari bat izatea instituzioetan. "Herri askotako udaletan lehentasunezko ildo estrategikotzat dute merkataritza, ez dutelako jendeak lo egiteko erabiltzen duen herri bizigabe bat nahi. Laudio eskualdeko herririk handiena izaki, zailtasun garaietan merkatari, ostalari eta gainontzeko zerbitzuak babestearen aldeko apustu garbiagoa egin beharko luke".
Gaineratu dutenez, herriko merkataritza jasangarritasunaren sinonimoa da, "garraioa erabiltzea saihesten duelako. Gainera Laudioko udalarentzako errentagarria da, azken 13 urteetan 1.5 miloi euro baino gehiagoko laguntza jaso duelako Eusko Jaurlaritzaren bitartez herri merkataritzaren garapenerako".