Aiarako kuadrilako udalbatzan aurrekontuak eta partaideen dietak onartu dituzte. Besteak beste, batzorde informatiboetara eta Aiarako kuadrilako bilerara azaltzen den juntero bakoitzak 60 euro kobratuko ditu hemendik aurrera. Batzorde informatiboetan parte hartzeagatik, aldiz, lehendakariak 120 euro eskuratuko ditu. Proposamen honen alde agertu dira alderdi politiko gehienak. Bildu izan da salbuespena, abstentzioa bozkatu baitu.
Tirabira, ordea, Gobernu Taldeko eta Aiarako lehendakariak saio bakoitzagatik gainontzekoen bikoitza -240 euro- kobratzeko EAJk egindako proposamenetik sortu da. Desplazamenduak dieten barnean leudeke.
Onartutako aurrekontuen arabera Aiarako Kuadrila kudeatzeara 36.000 euro bideratuko dira Txaro Sarasua PSEko ordezkariak ekintza bera bi tarifetan ordaintzea arazotzat ikusi du: “Diru guzti horretatik 2.470 euro lehendakariaren dietak lirateke, 9.733 euro presidenea izateagatik jasotako soldata, eta 3.407 euro haren gizarte segurantza”.
Sarasuaren aburuz, lehendakariaren soldata aurrekontutik kanpo egon beharko litzateke: “Udalbatza horretan alderdi sozialistako bi zinegotzik hitza eskatu genuen, baina Mikel Lasak ukatu egin zigun. Horregatik, gure gauzak hartu eta alde egin genuen Robertok -Amurrioko PSEko zinegotziak- eta nik”.
Sarasuak argitu duenez, Aiarako Kuadrilako udalbatzetan zinegotziek alde eginez gero ez da bozkarik kontabilizatzen. Haatik, “zentzugabetzat” jo du Mikel Lasak PSEkoen bozka abstentzio gisa katalogatzea, “jende guztia izan zen guk alde egin genuenaren eta itzuli ez ginaren lekuko. Aktan hori mantenduko balitz inpugnatu egingo dugu”.
2012ko aurrekontuak
Era berean, 2012 urterako aurrekontuak onartu dira. Ogasun eta finantzan, esaterako, 2.078,858,45 euro inbertituko dira. Orain, herritarrei egitasmoa aurkeztu beharko diete; eta iradokizunik ezean Arabako Buletin Ofizialean argitaratzea izango litzateke hurrengo pasua. Hortik Arabako Diputaziora igorriko da diru eskaera, kasu bakoitzari dagokion administraziotik jarraipena emateko.