2012ko aurrekontuen onarpena kolokan dago Orozkon. Izan ere, aurrekontuak onartzeko desadostasuna da nagusi ADIE, EAJ eta Bilduren artean. Josu San Pedro alkatearen hitzetan, “blokeo egoera” Bildu eta EAJ alderdien jokaerari zor zaio. “Bi alderdi horien jarrera arduragabekeria handia da, ezin ditugulako gastuak aurten aurreikusita dauden diru sarreren beherakadara egokitu”.
Udal aurrekontuen onarpena "luzapen egoeran" egotea inbertsioak egiteko oztopotzat jo du: “Onartu ezik ezin diegu ikastetxearen eraikina, Haur eskola, HAPO, eta legez kanpoko zabortegiei heldu”. Izan ere, herritarrek basobideetan zaborra pilatzearen joera nabarmen igo da Orozkon.
Alkateak azaldu duenez aurrekontuen zirriborroa abenduan helarazi zieten EAJ eta Bilduri: “Oraindik ezin ditugu onartu Zubiaur Eraikuntzak elkartearen aurrekontua bateratu behar delako”. Zehaztu duenez, Hegalden 110 etxebizitza eraikitzeko proiektuaren auditoria eskatu zuen enpresa horrek. Zubiaur Eraikuntzakeko lehendakaria Adiekoa da. Haatik, EAJ zein Bilduren aurkako iritziak prozesuan eragina izan duela adierazi du San Pedrok: “Zubiaur Eraikuntzakeko administrazio aholkulariak abendutik darama aurrekontuekin lanean, eta orain arte alderdi batek ere ez du oztoporik jarri”. Oharraren arabera, Orozkon ez dago 2012an etxebizitzak eraikitzea bideragarri egiten duen erosleen izen poltsarik. Urtea igaro ahala etxebizitzen eskaera haziko balitz, aurrekontuak moldatzea posible dela gogorarazi du San Pedrok.