Laudioko Ganbegi taldea Espainiako hockey sala txapelketako azken fasera sailkatu da. Asteburuan zehar jokatu dira Santanderren (Espainia) partiduak; laudioarrek hiru partidutik bi irabazi dituzte. Izan ere, Covadonga 6-3 garaitu dute, eta Parayas taldea 6-0. Sardinero hockey taldearen kontra, ordea, ez dute garaipena lortzerik izan; 2-1 galdu baizuten aiararrek.
Asteburu honetan ospatuko da Terrassan (Herrialde Katalanak) Espainiako Hockey sala txapelketako finala. Antolatzaileek, bi taldetan banatu dute azken fasea. Ondorioz, Egara, Club de Campo eta Complutense taldeak izango dituzte laudioarrek aurkari. Beste taldean, aldiz, Atletic de Terrassa, Taburiente, Zaragoza eta Valles Esportiu klubak lehiatuko dira.
Hector Borge Chozas jokalariaren esanetan, azken fasea jokatzeko taldekideak biltzea da Ganbegikoen kezka nagusia: "Txapelketa honetan jokatzeko bakoitzak bere lanean egun libreak eskatu beharko ditu". Haatik, zalantzan du taldeak finalean parte hartzea.
Ostiral eta larunbat eguerdia bitartean izango dira finalerdietara sailkatzeko partidak. Emaitzen arabera larunbat arratsaldean erabakiko dira bosgarren, seigarren, zazpigarren eta zortzigarren postuak. Txapelduna nor den jakin nahi duenak, baina, igande goiza igaro arte itxaron beharko du. Izan ere, A eta B taldeetako lehenengo eta bigarren taldeek orduan jokatuko dute hirugarren, laugarren, bigarren edo lehenengo postua eskuratzeko balioko duen partida.