Laudioko gazte independentistek kontzentrazioa egingo dute bihar 20:00etan Lamuza plazan Aitor Aspuru gazte laudioarrari elkartasuna helarazteko. 2009ko urtarrilean Abiadura Handiko Trena salatzeko mobilizazio batean atxilotu zuten gaztea: "jende multzo handi bat obratan sartu eta bertan eseri zen. Ertzaintzak bere bortizkeri osoa azaldu zen, beldurra zabalduz, hamarnaka pertsona erasotuz eta zortzi pertsona atxilotuz. Atxilotuetako bi, ondoren absolbitu zituzten".
Aspururekin batera, bost lagun gehiago epaituko dituzte etzi Gasteizen. Fiskaltzaren eskakizunak 40 eguneko pena-isunatik bi eta lau urte bitarteko kartzela zigorrera bitartekoak dira. Desobedientzia, istiluak eta autoritatearen aurkako atentatua atxikitzen zaizkie.
Gazte independentisten arabera, etziko epaiketa ez da laudioarrak jasaten ari diren bakarra: "Apartheida salatzearren 17 laudioar Espainiako Auzitegi Nazionalean epaituko dituzte eta espetxeratzeko arriskuan dute". Haatik, dei egin diote herritar orori gazteen aurkako epaiketak salatu eta mobilizazioetan parte hartzera.