Larunbat honetan egingo dute Arrankudiaga eta Zolloko mendi martxaren bederatzigarren edizioa. Gero eta gehiago dira urterik urte martxara hurbiltzen direnak, antolatzen diren bi ibilbideei ekiteko: luzeari eta laburrari. Mendi martxa Gizarte Etxeak antolatzen du, Arrankudiaga eta Zolloko udalaren laguntzarekin.
Aurtengo ibilbidea honako hau izango da: Gizarte Etxea , Goizarri, Basakoetxe, Kamaraka azpia, Galarraga (luzea egiten dutenentzat) , Santa Luzia, Pagobakarra, Otxanduri eta Gizarte Etxea. Ibilbide luzeak 28 kilometro izango ditu eta Galarraga gaina zeharkatuko du. Bide hau egin nahi dutenak goizeko 7etan aterako dira. Bide laburrak 20 kilometro izango ditu eta goizeko 9etan hasiko da martxa. Bi ibilbideak Gizarte Etxetik abiatuko dira eta Santa Luzian elkartuko dira hamaiketakoa egiteko. Hamaiketakoa Gizarte Etxearen eskura izango da.
Martxa bukatu ostean eta indarrak berreskuratzeko, bazkaria egingo da Gizarte Etxean. Menua: paella, arkumea eta etxeko postrea. Bazkaltzera geratu nahi duenak Gizarte Etxean apuntatu beharko du izena, irailaren 29a baino lehen. Antolatzaileek mendi martxan parte-hartzera gonbidapena luzatu dute.