ADIE talde independienteak jakinarazi duenez herri kontsulta egingo du ekainaren 23an orozkoarrek Jesuriko parke eolikoa nahi duten ala ez jakiteko. ADIEren arabera, haien filosofiari jarraiki herritarrak parke eolikoen inguruan informatuta egotea izango dute lehendabiziko helburu: "Proiektuak ez du bakarrik gaur egungo herritarrengan eragingo, datozen belaunaldiengan ere eragina izango du". Horregatik, uste dute, biztanleen gehiengoaren babesa izan behar duela egitasmoak aurrera egiteko.
Hori dela eta, herri kontsulta deitu du udal hauteskundeak irabazi zituen taldeak datorren ostegunerako: "Ez du balio legalik izango, horretarako tramiteak oso zailak baitira eta denbora asko beharko genukeelako". Alabaina, ohartarazi dute, parke eolikoa ezartzeko prozedura azkartzen ari dela. "Ez dugu arriskatu nahi balio legala izango duen herri kontsulta egin aurretik aerosorgailuak jartzeko arriskura".
Horregatik, orozkoarrek parke eolikoen inguruan iritzia osatu ahal izateko informazio kanpainarekin jarraituko dute. Ostiral honetan, esaterako, Aiaraldea Zanpazu Bizirik taldea Jesuriko poroiektuak ingurumenean eragingo dituen kalteetaz mintzatuko da 19:30ean Kultur etxean. Horretaz gain, larunbat osoan zehar herritarren zalantzak argitzeko asanblada parte hartzaileak egingo dituzte hiru auzo ezberdinetan. Aurreneko hitzordua Muruetako gizarte etxean izango da, 10:00etan. Bigarrena, 12:00etan egingo dute San Isidro elizan. Eta, azkena, 16:00etan Ibarrako ikastetxean.