Laudio udaleko Euskara Arloak "Bularretik mintzora" ekimena abiatu du. Helburua herriko gazteenengan irakurzaletasuna bultzatzea da. Izaskun Miñano Euskara Arloko Jarduneko Zinegotziaren hitzetan, bost urteko programa bat abiaraziko dute. "Hastapeneko bileretako emaitzen arabera, udal liburutegiak eta Lateorro, Lamuza, Fabian Legorburu eta Ikastola ikastetxeek hartuko dute parte, umeentzako geletan". Gaineratu dutenez, La Milagrosa eskola da ekimenari uko egin duen bakarra.
Bularretik mintzora
Laudiorentzat programa berria den arren, dagoeneko Euskal Herriko hamar herritan garatzen dabilen egitasmoa da Bularretik Mintzora. Datuek diotenez, 3000 ume ari dira ekimena jarraitzen. Miñanoren ustez, ekimena konplexua da :"Irakasle eta parte hartu nahi duten gurasoentzako formazio saio batzuk (ez dira ezinbestekoak baina bai komenigarriak) egongo dira, beraiek izango direlako bitartekariak. Eta ikastetxeek ere nolabaiteko presentzia dute arren, ekintzak liburutegian gauzatuko dira eskuarki. Udal liburuzainak izango dira, beraz, koordinazioaren arduradunak. Hala ere, gurasoekiko hedapena, ikastetxeen bitartekoa izango da. Sare konplexua beraz...".
Eskoletan garatuko diren ekintzez gain, kalea ere erabiliko du udalak irakurzaletasuna bultzatzeko: "Tailerrak, irakurketa klubak, liburu-trukaketak, liburu-motxila eta abar. Diseinuaz, programaren garapenaz eta goi-zuzendaritzaz Donostiako GALTZAGORRI elkartea arduratuko da". Ikastetxeetako ordezkariekin bigarrenez bildu ondoren, ekimena hurrengo ikasturte hasieran abiatzea da antolatzaileen asmoa.